Túrkistan oblysynyń turǵyny Qurmet Talapqazy mal ashtan qyrylyp jatqan óńirlerge shóp jetkizý jumystaryn uıymdastyrdy. 24 jastaǵy jigit alty vagon shóp pen tyǵyzdalǵan jońyshqa daıyndap qoıypty. Alaıda áli de malǵa qorek jetispeıdi. Bul týraly ol Tengrinews.kz tilshisine aıtyp berdi, dep habarlaıdy «Adyrna» ulttyq portaly.
Qurmet Talapqazy Shymkentte saýdamen aınalysady. Ashtan qyrylǵan mal týraly jańalyq aýyr tıgenin aıtqan ol iske kirisýdi uıǵarypty. Dostary men eriktilerdi jınap, shóp shabýdy bastap ketipti. Qarajat jınaýǵa da kirisken eken.
«Halqymnyń jaǵdaıy nashar, ásirese shaǵyn sharýashylyqpen aınalysatyndarǵa qıyn zaman týdy, soǵan qulazyp júrmin. Kómek bastap ketkenime qýanamyn, árıne, biraq bul maqtaný úshin emes, qýanýdyń ornyna iske kirisý kerek, jumys kóp. Ata-ájeler kózine jas alyp, alǵysyn jaýdyryp jatyr, batasyn berdi. Biraq raqmetin kútpeımin, árbir qazaq, óz eliniń azamaty meniń isimdi jasar edi. Qazir bárin jınalyp, kómektesýge shaqyramyn», - dep málimdedi ol.
Qurmet Talapqazy osymen ekinshi apta boıynda barlyq isin toqtatyp qoıyp, shóp shabýǵa kirisken, temirjolshylermen júk tasymaldaýǵa kelisim júrgizip, meenat izdestirip jatyr. Osy kúnge deıin alty vagon shóp jınap, Mańǵystaý men Batys Qazaqstan oblystarynyń aýdandaryna jetkizýmen aınalysyp jatyr.
«Qarapaıym halqymyzdan 1,6 mıllıon teńge tústi. Bul qarajat tolyqtaı jumsaldy. Bir vagonǵa jalpy 610 myń teńge qajet edi, biraq biz baǵasyn 380 myń teńgege deıin túsirýge kelistik. Jetpegenin qaryzǵa aldyq. Bul qarajattyń bári halyqtyki, iri bıznesmenderdiń eshqaısy ázirshe qyrýar aqsha jibere qoımady. Kómektesemiz degen, biraq áli joq», - dedi ol.
Jigit alty vagon shóp uzaqqa jete qoımaıtynyn aıtady. Qysqa da mal azyǵyn izdeý kerek.
«Qazaqstannyń batysyn shóppen qazir qamtamasyz etpesek, qysta mal qyrylady. Qysta tipti batysta ǵana emes, ońtústikte de, Qyzylorda men Aralda da mal qyrylady. Kelesi jyly shóp te qymbattaıdy, et te. Qazir ettiń kelisi eki myń teńge bolsa, kelesi jyldary 7-10 myń teńge bolady. Sonda bizde ekonomıkalyq úlken daǵdarys bolady. Kúz ben qys kelmeı turyp, shóp ázirleýimiz kerek. Ár oblystan 10-15 vagonnan jibersek jaqsy bolar edi. Qazir Túrkistan men Shymkentte Qazyǵurtqa, Qarataýǵa jáne Sozaqqa barar joldaǵy dalany shaýyp jatyrmyz, sosyn Shyǵys Qazaqstan men Soltústik Qazaqstan oblysyna shópke baramyz», - dep málimdedi ol.
Qurmet qataryna kóp adam qosylǵanyn da aıtyp otyr. Qazir basty problemasy - kólik pen jumysshylardyń joǵy.
«Kóbinen aýyl adamdary kómektesip jatyr, túk shóp berip jatyr. Qazirdiń ózinde 50-70-deı túk tyǵyzdalǵan jońyshqa jınadyq. Alaıda tasymaldaýda problema bar. Memleket kómektesip jatqan joq. Ázirshe aýyl ákimderi ǵana baılanysqa shyǵyp jatyr, biraq joǵarydaǵy bılik jaǵdaıǵa nazar aýdarmaı otyr», - dedi ol.
"Adyrna" ulttyq portaly
