وپەراتسيادان كەيىن كليەنتى قايتىس بولعان الماتىلىق پلاستيكالىق حيرۋرگ جازادان قۇلىپ كەتتى. سوت دميتري پيسارەۆتى كىنالى دەپ تاپقانىمەن، ونى باس بوستاندىعىنان ايىرعان جوق. ويتكەنى قىلمىستىق ءىستىڭ مەرزىمى ءوتىپ كەتىپتى. دەگەنمەن جابىرلەنۋشى تاراپتىڭ ماتەريالدىق شىعىن وتەپ بەرۋ تۋرالى ءوتىنىشى ءىشىنارا قاناعاتتاندىرىلىپ، حيرۋرگ مارقۇمنىڭ تۋىستارىنا 8 ميلليون تەڭگە وتەپ بەرۋگە مىندەتتەلدى. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
«پيسارەۆ دميتري قىلمىستىق كودەكستىڭ 317-بابى 3-تارماعى بويىنشا كىنالى دەپ تانىلسىن. ەسكىرۋ مەرزىمىنىڭ وتۋiنە بايلانىستى قىلمىستىق جاۋاپتىلىقتان بوساتىلسىن. ەشقايدا كەتپەۋ تۋرالى شارانىڭ كۇشى جويىلسىن»، - دەيدى بوستاندىق اۋداندىق سوتىنىڭ سۋلياسى رومان سەليتسكي.
ەستەرىڭىزگە سالا كەتسەك، قايعىلى وقيعا 2018 جىلدىڭ قازان ايىندا بولعان ەدى. دميتري پيسارەۆ بورتسەرىك بولىپ جۇمىس ىستەگەن لاۋرا ءىزباساروۆانىڭ كەۋدەسىنە وتا جاساپ جاتقان كەزدە ونىڭ جاعدايى ناشارلاپ، كوماعا تۇسكەن. سودان كەيىن قايتىس بولدى. دارىگەرگە ءوزىنىڭ كاسىبي مىندەتتىن دۇرىس اتقارمادى دەگەن ايىپ تاعىلعان بولاتىن.
ايتا كەتۋ كەرەك، بۇل پيسارەۆتىڭ قىزمەتىندەگى مۇنداي ءبىرىنشى قايعىلى جاعداي ەمەس. بۇدان ءۇش جارىم جىل بۇرىن ول ۋكراينادان الماتىعا ليپوساكتسيا جاساتۋ ءۇشىن كەلگەن 33 جاستاعى ايەلدىڭ ولىمىنە كىنالى دەپ تانىلعان ەدى. ول كەزدە دە حيرۋرگ قىلمىستىق ءىستىڭ مەرزىمىنىڭ ءوتىپ كەتۋىنە بايلانىستى تۇرمەگە وتىرماعان ەدى.
"ادىرنا" ۇلتتىق پورتالى
