يراندا «شاھيدتەردى» ەسكە الۋعا ارنالعان ءۇش كۇندىك ۇلتتىق ازا جاريالاندى. قۇقىق قورعاۋ ۇيىمدارىنىڭ مالىمەتىنشە، ەلدە ۇكىمەتكە جانە ەكونوميكالىق داعدارىسقا قارسى ەكى اپتاعا سوزىلعان جاپپاي نارازىلىقتار سالدارىنان 500-دەن استام ادام قازا تاپقان. بۇل تۋرالى حالىقارالىق اقپارات قۇرالدارى مالىمدەدى، دەپ حابارلايدى "ادىرنا".
يراننىڭ ىشىندەگى جانە شەتەلدەگى بەلسەندىلەرگە سۇيەنگەن اقش-تا ورنالاسقان HRANA قۇقىق قورعاۋ ۇيىمىنىڭ دەرەگىنشە، ەكى اپتا ىشىندە 490 نارازىلىق ءبىلدىرۋشى مەن قاۋىپسىزدىك كۇشتەرىنىڭ 48 قىزمەتكەرى كوز جۇمعان. سونىمەن قاتار، 10 600-دەن استام ادام قاماۋعا الىنعان. بۇل مالىمەتتەردى Reuters اگەنتتىگى تاراتتى. الايدا اگەنتتىك بۇل اقپاراتتى تاۋەلسىز تۇردە راستاۋ مۇمكىن بولماعانىن اتاپ وتەدى.
يران بيلىگى قازا تاپقاندار سانىنا قاتىستى رەسمي ستاتيستيكانى جاريالاعان جوق. سوعان قاراماستان، مەملەكەتتىك اقپارات اگەنتتىكتەرى جەكسەنبى كۇنى «اقش پەن سيونيستىك رەجيمگە قارسى كۇرەس كەزىندە قازا تاپقان شاھيدتەردى ەسكە الۋ ماقساتىندا» ەلدە ءۇش كۇندىك ۇلتتىق ازا تۇتۋ جاريالانعانىن حابارلادى.
نارازىلىقتار ەلدە باسىلار ەمەس. كەرىسىنشە، قازا تاپقاندار سانىنىڭ ارتۋى مەن ينتەرنەتتىڭ جاپپاي ءوشىرىلۋى جاعدايدى ودان ءارى ۋشىقتىرعان. 8 قاڭتاردان باستاپ يران اۋماعىندا ينتەرنەت بايلانىسى شەكتەلىپ، الەۋمەتتىك جەلىلەر مەن مەسسەندجەرلەرگە قولجەتىمدىلىك كۇرت تومەندەگەن.
ساياسي شيەلەنىس تە كۇشەيىپ كەلەدى. تەگەران ەگەر اقش پرەزيدەنتى دونالد ترامپ نارازىلىق بىلدىرۋشىلەردى قولداپ، يرانداعى جاعدايعا ارالاسۋ تۋرالى ايتقان قاۋىپتەرىن جۇزەگە اسىرسا، امەريكالىق اسكەري بازالارعا سوققى بەرۋى مۇمكىن ەكەنىن ەسكەرتتى.
ايتا كەتەيىك، يرانداعى جاپپاي نارازىلىقتار 28 جەلتوقساندا ەلدە باعانىڭ كۇرت قىمباتتاۋىنا بايلانىستى باستالىپ، كەيىن ۇكىمەتكە قارسى ساياسي سيپاتتاعى اكتسيالارعا ۇلاسقان. يران بيلىگى تارتىپسىزدىكتەردى قوزدىردى دەپ اقش پەن ءيزرايلدى ايىپتاپ، دۇيسەنبى كۇنى اتالعان ەلدەردىڭ «تەرروريستىك ارەكەتتەرىن» ايىپتاۋ ماقساتىندا جالپىحالىقتىق ميتينگ وتكىزۋگە شاقىردى.
قازىرگى تاڭدا يرانداعى جاعداي حالىقارالىق قاۋىمداستىقتىڭ نازارىندا. ساراپشىلار ەلدەگى ەكونوميكالىق قيىندىقتار مەن ساياسي قىسىمنىڭ قاتار كۇشەيۋى احۋالدى ودان ءارى تۇراقسىزداندىرۋى مۇمكىن ەكەنىن ايتۋدا.
