«الاتاۋ» تەاترى كەزەكتى دەمالىستا

2195
Adyrna.kz Telegram

               الماتى قالالىق مادەنيەت باسقارماسىنا قاراستى «الاتاۋ» ءداستۇرلى ونەر تەاترى 4–ماۋسىم شىمىلدىعىن سالتاناتتى تۇردە «بەرەكەلى باق وردا» اتتى مەرەكەلىك كونتسەرتپەن جاپتى.

كەشكە كەلگەن كورەرمەندەر قاراسى كوپ بولدى. ۇلتتىق بولمىسىمىزدى ايقىندايتىن ءداستۇرلى ءان-كۇي، جىر، ايتىس ونەرىمەن ورىلگەن كەشتىڭ رەجيسسەرى جۇلدىزبەك جۇمانباي.  اتا-بابالارىمىز امانات ەتىپ قالدىرعان حالقىمىزدىڭ اسىل قازىناسىن رەجيسسەر كاسىبي شەبەرلىگى مەن تاپقىرلىعىن ۇشتاستىرۋ ارقىلى كورەرمەنگە زاماناۋي، كوڭىلدى، تاڭداي قاقتىرارلىقتاي جاڭا فورماتتاعى كەش سىيلادى. دەمەك ونەردى باپتايتىن ناعىز باپكەر بولعاندا عانا شەبەرلىكتىڭ بيىك شىڭىنا كوتەرىلۋگە بولادى. وسى تۇرعىدا مەرەكەلىك كەشكە ءار بەرىپ تۇرعان «الاتاۋ» ءانسامبىلىنىڭ ونەرىن ايتپاي ءوتۋ ءتىپتى مۇمكىن ەمەس. انسامبل ونەرلى جاستاردان قۇرالعان. ولاردىڭ بارشاسى ۇلتتىق اسپاپتاردا ويناۋدىڭ ەرەكشە تەحنيكالارىن تەرەڭ مەڭگەرگەن. بۇگىنگى كەشتە انسامبل ۇجىمى تابيعاتتاعى بارلىق تiرi تابيعاتتىڭ ءۇنiن اينىتپاي  بەرە ءبىلدى. ال، جىرشىلارىمىز ءار مەكتەپتىڭ ءداستۇرىن بۇزباي، ورىنداعان بولسا، انشىلەرىمىز ءان ايتۋدىڭ بارلىق قىر-سىرى مەن ادىستەرىن مەڭگەرگەندىكتەرىن بايقاتتى. «الاتاۋ» ونەرپازدارى كەشكە جينالعان حالىقتىڭ رۋحاني تالاپ-تىلەگىن قاناعاتتاندىرا ءبىلدى. ولمەس ونەر تىلىمەن وتكەن ۋاقىت پەن حالقىمىزدىڭ سوناۋ جىلدارداعى پورترەتىن كورەرمەننىڭ كوز الدىنا اكەلە ءبىلدى.

مۇندايدى بۇرىن سوڭدى ەستىپ كورمەگەن كورەرمەندەر نازارى تەك  ساحنادا بولدى. باس اياعى ءبىر ساعاتقا سوزىلعان كەشتىڭ تارتىمدى وتكەندىگى سونشا، جينالعان ەل كونتسەرتتىڭ جالعاسقانىن قالادى.

اتالمىش سالتاناتتى كەشتىڭ ارنايى قوناقتارى; اقىن، ساتيريك - اكىم ىسقاق پەن  اكتەر، قازاقستاننىڭ ەڭبەك سىڭىرگەن قايراتكەرى – بەكجان تۇرىس پىكىرلەرىن ءبىلدىردى.

اكىم ىسقاق – اقىن، ساتيريك.

«ترافارەتتىك كونتسەرت ەمەس وزگەشە ءبىر كەرەمەت، قازاقتىڭ رۋحىن، جان دۇنيەسىن، تەبىرەنىسىن، ومىرگە دەگەن قۇلشىنىسىن كوتەرەتىن، زاماناۋي اندەر مەن بۇرىنعى اندەردى ۇشتاستىراتىن كومپوزيتسيا بولدى. تەاتر ارتيستەرىنە، انشىلەرگە وتە ريزامىن، جاساي  بەرسىن الاتاۋدىڭ  ونەر ورداسى، جاساي بەرسىن الاتاۋدىڭ ءداستۇرلى ونەر بيىگى».

بەكجان تۇرىس – اكتەر، قازاقستاننىڭ ەڭبەك سىڭىرگەن قايراتكەرى.

«مەن قازاق دالاسىنان قازاقتى ىزدەدىم، سول قازاقتى وسى تەاتردان تاپتىم. ەندى مەن سىزدەردىڭ تۇراقتى كورەرمەندەرىڭىز بولامىن».

رينات زايتوۆ – «الاتاۋ» ءداستۇرلى ونەر تەاترىنىڭ ديرەكتورى.

تەاتر باسشىسى ۇجىمدى كەزەكتى ماۋسىمنىڭ ناتيجەلى اياقتالۋىمەن قۇتتىقتاپ، الداعى ۋاقىتتا كورەرمەندەردى تىڭ، اۋقىمدى تۋىندىلار كۇتىپ تۇرعانىن  ايتا كەتتى.

«الاتاۋ» ءداستۇرلى ونەر تەاترىنىڭ نەگىزگى ماقساتى ۇلتىمىزعا عانا ءتان ءان (جىر، تولعاۋ، ايتىس) ونەرىمىزدىڭ قايماعىن بۇزباي كەلەر ۇرپاققا قاز-قالپىندا جەتكىزۋ.

 

«الاتاۋ» ءداستۇرلى ونەر تەاترى

«ادەبيەت» ءبولىمىنىڭ مامانى;                              اقبوتا تويبەكقىزى

پىكىرلەر