اقتوبەدە ەكى كۇننەن بەرى تولاسسىز جاۋعان جاڭبىردان قالا كوشەلەرى سۋعا تولىپ، تۇرعىندار ايالدامادا ساعاتتاپ اۆتوبۋس كۇتۋگە ءماجبۇر دەپ حابارلايدى "ادىرنا" ۇلتتىق پورتالىنىڭ ءتىلشىسى.
ءبىر ايعا جۋىق ۋاقىتقا سوزىلعان اپتاپ ىستىقتان كەيىن اقتوبەگە 6 شىلدەدە جاۋىن جاۋدى. تۇرعىندار باسىندا كۇننىڭ سالقىنداپ، جاڭبىر جاۋعانىنا قۋاندى. الايدا كۇنى-ءتۇنى تولاسسىز جاۋعان جاۋىننان قالا كوشەلەرى سۋعا تولىپ، جاياۋ جۇرگىنشىلەردى ءبىراز ابىگەرگە سالدى. سونداي-اق كولىك جۇرگىزۋشىلەرى سۋ سورعىلاۋمەن اينالىساتىن مەكەمەلەردىڭ جۇمىسىنا كوڭىلى تولمايتىندارىن ايتىپ، نارازىلىق تانىتۋدا.
سينوپتيكتەردىڭ مالىمەتى بويىنشا، سوڭعى ءبىر تاۋلىكتە جاۋعان جاڭبىر مولشەرى 54,7 ميلليمەتردى قۇراعان. ال شىلدە ايىنداعى بولجام بويىنشا، جاۋىن-شاشىن مولشەرى 29 ميلليمەتر بولۋى ءتيىس. ياعني، اقتوبەدە ەكى كۇندە ەكى ايلىق جاۋىن-شاشىن مولشەرى تۇسكەن.
اقتوبە قالالىق اكىمدىگىنىڭ مالىمەتىنە سۇيەنسەك، ەكى كۇندە قالا اۋماعىندا جاڭبىر سۋىن ارنايى تەحنيكانىڭ كومەگىمەن جانە ناسوستار ارقىلى سورعىلاۋ، سۋاعارلار ارقىلى سازدىعا قاراي اعىزۋ جۇمىستارى جۇرگىزىلۋدە. بۇل جۇمىستارعا 100-دەن استام تەحنيكا جۇمىلدىرىلعان. 40-تان استام ادام ارىقتارعا سۋدىڭ باعىتىن بۇرۋ جۇمىستارىمەن اينالىسۋدا. قازىر 5 ناسوستىق ستانتسيا جۇمىس ىستەپ تۇر جانە 10 ستاتسيونارلىق ناسوس شۇعىل ىسكە قوسىلعان.
سونداي-اق تۇندە قالا اۋماعىندا قاتتى جەل تۇرىپ، سونىڭ سالدارىنان تۇرعىن ۇيلەر مەن كوشەلەردەگى اعاشتار قۇلاپ، بىرقاتار كولىكتەردى باسىپ قالعان. ال بىرنەشە اۋداندا قاتتى جەلدىڭ كەسىرىنەن جارىق وشكەن. سونداي-اق قالا ىشىندەگى قوعامدىق كولىكتەردىڭ قوزعالىسى باياۋلاعان.
— جاۋىن جاۋمادى دەپ ەدىك. ەكى كۇندە كوشەلەر كولگە اينالدى. جاۋىننىڭ بولعانى جاقسى، دەگەنمەن جاياۋ جۇرگىنشىلەر كوشە جولدارىنداعى سۋدان جۇرە الماي جاتىرمىز. قالاداعى كوشەلەردە سۋاعاردىڭ بولماۋىنان جىل سايىن وسىنداي ماسەلەگە تاپ بولاتىنىمىز وكىنىشتى. سوڭعى كەزدە قالا ىشىندەگى اۆتوبۋستاردىڭ ءجۇرۋ جيىلىگى دە سيرەپ بارادى. ساعاتتاپ كولىك كۇتۋگە تۋرا كەلەدى. كەيدە تاڭەرتەڭ جۇمىستان دا قالىپ بارامىز. وسى ماسەلەلەردى جاۋاپتى تۇلعالار نازارعا السا دەگەن ءبىر تىلەك بار. كۇزدە دە وسى ماسەلە قايتالانادى، — دەيدى اقتوبە قالاسىنىڭ تۇرعىنى ساعىنىش سارباەۆا.
ايتا كەتۋ كەرەك، اقتوبە قالاسى اۋماعىندا 8-9 شىلدەدە تاعى دا تولاسسىز جاڭبىر جاۋادى دەپ كۇتىلۋدە.
"ادىرنا" ۇلتتىق پورتالى.
