توكيونىڭ ورتالىق بولىگىندە 34 كۇن قاتارىنان جاڭبىر جاۋدى، دەپ حابارلايدى "ادىرنا" ءتىلشىسى.
ۇزدىكسىز جاۋىن-شاشىن 29 قىركۇيەككە دەيىن جالعاسىپ، بۇل كورسەتكىش جاپونيادا مەتەورولوگيالىق باقىلاۋ جۇرگىزىلە باستاعان 1886 جىلدان بەرگى ەڭ ۇزاق كەزەڭ رەتىندە تىركەلدى.
جاپونيا مەتەورولوگيالىق اگەنتتىگىنىڭ مالىمەتىنشە، بۇعان دەيىنگى رەكورد 2019 جىلى تىركەلگەن. سول كەزدە توكيونىڭ ورتالىعىندا 27 ماۋسىم مەن 29 شىلدە ارالىعىندا 33 كۇن قاتارىنان جاڭبىر جاۋعان.
بيىلعى ۇزاققا سوزىلعان جاۋىن-شاشىنعا حونسيۋ ارالى ماڭىندا ورنالاسقان تۇراقتى اتموسفەرالىق فرونت اسەر ەتكەن. سونداي-اق جىلى ءارى ىلعالدى اۋانىڭ بىرنەشە رەت كەلۋى جانە تايفۋنداردىڭ جاقىنداۋى جاۋىن-شاشىن مولشەرىنىڭ ارتۋىنا ىقپال ەتكەن.
27 قىركۇيەكتەگى جاعداي بويىنشا توكيونىڭ ورتالىعىندا قىركۇيەك ايىندا 621,5 ميلليمەتر جاۋىن-شاشىن تۇسكەن. بۇل ايلىق ورتاشا كورسەتكىشتەن شامامەن ءۇش ەسە كوپ. قىركۇيەكتەگى ەڭ جوعارى كورسەتكىش 1958 جىلى تىركەلىپ، ول كەزدە 670,9 ميلليمەتر جاۋىن-شاشىن تۇسكەن.
سونىمەن قاتار 1–27 قىركۇيەك ارالىعىندا توكيونىڭ ورتالىعىندا كۇن ساۋلەسى نەبارى 45,8 ساعات بويى بايقالعان. بۇل — باقىلاۋ تاريحىنداعى ەڭ تومەن كورسەتكىشتەردىڭ ءبىرى.
مەتەورولوگتاردىڭ مالىمەتىنشە، 30 قىركۇيەكتە توكيو ورنالاسقان كانتو ايماعىندا اتموسفەرالىق فرونتتىڭ اسەرىنەن جاڭبىر قايتا جاۋى مۇمكىن.
