7 ءساۋىر كۇنى كەشكە الماتى قالاسىندا اۋا رايىنىڭ كۇرت قۇبىلىپ، جەل مەن نوسەر جاۋىن ورىن الدى. تابيعاتتىڭ توسىن مىنەزى قالا تۇرعىندارىنا بىرقاتار قيىندىقتار تۋدىردى، دەپ حابارلايدى “ادىرنا” ۇلتتىق پورتالى.
الەۋمەتتىك جەلىلەردە تاراعان بەينەجازبالاردا جەلدىڭ كۇشتى ەكپىنىمەن ۇيلەردىڭ شاتىرلارى ۇشىپ كەتكەنى، كوشەدەگى ماڭدايشالار مەن جارنامالىق تاقتايشالاردىڭ سىنعانى انىق كورىنەدى.
تاۋگۇل ىقشاماۋدانىنداعى بەس قاباتتى تۇرعىن ءۇيدىڭ شاتىرىن جەل ۇشىرىپ كەتكەنى تۋرالى جەلىدە اقپارات تارادى.
نوسەر جاۋىن سالدارىنان كەي تۇرعىن ۇيلەردىڭ بالكوندارى سۋ وتكىزە باستاعان. كوشە بويىنداعى اعاشتار قۇلاپ، بىرنەشە كولىككە زيان كەلتىرگەن. سونىمەن قاتار، كەيبىر اۋدانداردا جارىق پەن ينتەرنەت ۋاقىتشا ءوشىپ قالعان.
قالا كوشەلەرى شاعىن وزەندەرگە اينالىپ، قوزعالىس قيىندادى. دەگەنمەن، الماتىلىقتار قيىندىققا قاراماستان، كوتەرىڭكى كوڭىل كۇيدە قالۋعا تىرىسىپ جاتىر. جەلىدە «بالكىم، ەرتەڭ دەمالىس بولار؟»، «بۇل – استانالىقتاردىڭ كوكتەمدى ەرتە باستاعانىمىزعا كەگى»، «ەسەسىنە، قالا جەلدەتىلدى» دەگەن ازىلگە تولى پىكىرلەر جازىلۋدا.
قازگيدرومەت 7 ساۋىردەن 8 ساۋىرگە قاراعان ءتۇنى الماتى مەن قوناەۆ قالالارىندا بۇرشاق جاۋىپ، جەل ەكپىنى سەكۋندىنا 28 مەترگە دەيىن جەتەتىنىن ەسكەرتكەن بولاتىن. تجد الماتى تۇرعىندارى مەن قوناقتارىنا قاۋىپسىزدىك شارالارىن ساقتاۋعا، تاۋعا سەرۋەندەۋدەن باس تارتۋعا كەڭەس بەردى.
«ەلەكتر جەلىلەرىنىڭ بۇتىندىگىن تەكسەرىڭىزدەر، كولىكتەرىڭىزدى اعاشتاردىڭ استىنا قويماڭىزدار، ءالسىز بەكىتىلگەن قۇرىلىستاردان اۋلاق بولىڭىزدار – بۇل ادام جاراقاتىنا اكەلۋى مۇمكىن»، – دەپ مالىمدەدى قۇتقارۋشىلار.
ايتا كەتەيىك، ەكى كۇن بۇرىن الماتىدا شاڭدى داۋىل سوعىپ، قالا تۇرعىندارىنا تاعى دا قيىندىق تۋعىزعان ەدى.
