23 قىركۇيەكتە الماتىدا جاۋعان نوسەر جاۋىن امانجول كوشەسىنىڭ ۋچاسكەسىنە تاعى دا زاقىم كەلتىردى. ءبىر اپتا بۇرىن ءدال وسى اۋماقتا 13 اۆتوكولىك زاقىمدانعان ەدى، دەپ حابارلايدى «ادىرنا» ءتىلشىسى.
تۇرعىندار «جاڭبىر جاۋسا، كوشەمىز ارىققا اينالادى» دەپ نارازىلىق ءبىلدىرىپ وتىر.
اۋەزوۆ اۋدانىنىڭ اكىمى ابزال ەگەمبەرديەۆ تۇرعىندارمەن كەزدەسىپ، اتالعان اۋماقتاعى ۋاقىتشا قولايسىزدىقتارعا بايلانىستى قازىرگى جاعدايدى ءتۇسىندىردى.
«قازىرگى تاڭدا مۇندا «QAZAQGAZ AIMAQ» اق تاراپىنان گاز قۇبىرىنىڭ قۇرىلىسىنا قاتىستى جەر قازۋ جۇمىستارى جۇرگىزىلۋدە. كومپانيانىڭ مالىمەتىنشە، قولايلى اۋا رايى جاعدايىندا قۇرىلىس-مونتاج جۇمىستارى 7 كۇن ىشىندە اياقتالادى»،—دەدى ول.
جۇمىستار تولىق بىتكەننەن كەيىن اۋدان اكىمى اپپاراتى كوشەنى اباتتاندىرۋ مەن جول جابىنىن قالپىنا كەلتىرۋدى قامتاماسىز ەتپەك.
اكىمدىك جاۋىن-شاشىن كەزىندە سۋ باسۋدىڭ الدىن الۋ ءۇشىن اۋماقتا تاۋلىك بويى كەزەكشى بريگادا جۇمىس ىستەيتىنىن مالىمدەدى. ايتۋلارىنشا، قاجەت بولعان جاعدايدا سۋدى سورۋ، وتكەلدەردى تازالاۋ جانە سۋدى بۇرۋ شارالارى جۇرگىزىلەدى.
ەسكە سالايىق، 16 قىركۇيەكتە قاتتى جاۋىننان كەيىن امانجول كوشەسىندە جول شۇڭقىرلانىپ، 13 اۆتوكولىك زاقىمدانعان ەدى. 19 قىركۇيەكتە قالا اكىمى دارحان ساتىبالدى مەردىگەرلەرگە تيىسىنشە باقىلاۋ جاساماعانى ءۇشىن اۋەزوۆ اۋدانىنىڭ اكىمىنە قاتاڭ سوگىس جاريالاعان بولاتىن.
