Aqtóbede eki kúnnen beri tolassyz jaýǵan jańbyrdan qala kósheleri sýǵa tolyp, turǵyndar aıaldamada saǵattap avtobýs kútýge májbúr dep habarlaıdy "Adyrna" ulttyq portalynyń tilshisi.
Bir aıǵa jýyq ýaqytqa sozylǵan aptap ystyqtan keıin Aqtóbege 6 shildede jaýyn jaýdy. Turǵyndar basynda kúnniń salqyndap, jańbyr jaýǵanyna qýandy. Alaıda kúni-túni tolassyz jaýǵan jaýynnan qala kósheleri sýǵa tolyp, jaıaý júrginshilerdi biraz ábigerge saldy. Sondaı-aq kólik júrgizýshileri sý sorǵylaýmen aınalysatyn mekemelerdiń jumysyna kóńili tolmaıtyndaryn aıtyp, narazylyq tanytýda.
Sınoptıkterdiń málimeti boıynsha, sońǵy bir táýlikte jaýǵan jańbyr mólsheri 54,7 mıllımetrdi quraǵan. Al shilde aıyndaǵy boljam boıynsha, jaýyn-shashyn mólsheri 29 mıllımetr bolýy tıis. Iaǵnı, Aqtóbede eki kúnde eki aılyq jaýyn-shashyn mólsheri túsken.
Aqtóbe qalalyq ákimdiginiń málimetine súıensek, eki kúnde qala aýmaǵynda jańbyr sýyn arnaıy tehnıkanyń kómegimen jáne nasostar arqyly sorǵylaý, sýaǵarlar arqyly Sazdyǵa qaraı aǵyzý jumystary júrgizilýde. Bul jumystarǵa 100-den astam tehnıka jumyldyrylǵan. 40-tan astam adam aryqtarǵa sýdyń baǵytyn burý jumystarymen aınalysýda. Qazir 5 nasostyq stanııa jumys istep tur jáne 10 staıonarlyq nasos shuǵyl iske qosylǵan.
Sondaı-aq túnde qala aýmaǵynda qatty jel turyp, sonyń saldarynan turǵyn úıler men kóshelerdegi aǵashtar qulap, birqatar kólikterdi basyp qalǵan. Al birneshe aýdanda qatty jeldiń kesirinen jaryq óshken. Sondaı-aq qala ishindegi qoǵamdyq kólikterdiń qozǵalysy baıaýlaǵan.
— Jaýyn jaýmady dep edik. Eki kúnde kósheler kólge aınaldy. Jaýynnyń bolǵany jaqsy, degenmen jaıaý júrginshiler kóshe joldaryndaǵy sýdan júre almaı jatyrmyz. Qaladaǵy kóshelerde sýaǵardyń bolmaýynan jyl saıyn osyndaı máselege tap bolatynymyz ókinishti. Sońǵy kezde qala ishindegi avtobýstardyń júrý jıiligi de sırep barady. Saǵattap kólik kútýge týra keledi. Keıde tańerteń jumystan da qalyp baramyz. Osy máselelerdi jaýapty tulǵalar nazarǵa alsa degen bir tilek bar. Kúzde de osy másele qaıtalanady, — deıdi Aqtóbe qalasynyń turǵyny Saǵynysh Sarbaeva.
Aıta ketý kerek, Aqtóbe qalasy aýmaǵynda 8-9 shildede taǵy da tolassyz jańbyr jaýady dep kútilýde.
"Adyrna" ulttyq portaly.
