ەلىمىزدە «ەلباسى جىلۋى» اتتى كەڭ اۋقىمدى قايىرىمدىلىق جوباسى جالعاسىپ جاتىر. حالىقتىڭ زور ىقىلاسىنا بولەنگەن يگى شارا ەلباسىنىڭ باستاماسىمەن ۇيىمداستىرىلدى دەپ حابارلايدى "ادىرنا" ۇلتتىق پورتالى.
بۇل جولى اتالعان جوبا تاراز، تالدىقورعان، ورال قالالارىندا، سونداي-اق، الماتى جانە اقمولا وبلىستارىندا تۇراتىن 1 000 وتباسىنى قامتىماق.
جوبانىڭ ماقساتى – از قامتىلعان، كوپبالالى جانە ەرەكشە كۇتىمدى قاجەت ەتەتىن بالالارى بار وتباسىلاردى قولداۋ. ءىس-شارا اياسىندا مۇقتاج وتباسىلارعا ۇن، كارتوپ، جەمىس، كۇرىش، قاراقۇمىق، ءشاي، قانت، كۇنباعىس مايى سياقتى ازىق-تۇلىك پەن گيگيەنالىق زاتتار بەرىلەدى. قايىرىمدىلىق شاراسىنا ىلىككەن ءار وتباسى 130 كيلوگرامعا دەيىن تاۋار الادى.
قازىرگى ۋاقىتتا ۇيىمداستىرۋشىلار قاجەت تاۋارلاردى اقمولا، الماتى وبلىستارىنىڭ از قامتىلعان تۇرعىندارىنا جانە تاراز، تالدىقورعان قالالارىندا تۇراتىن ءال-اۋقاتى تومەن جاندارعا جەتكىزىپ ۇلگەردى.
مەرەكە قارساڭىندا وسىنداي پايدالى ءارى قاجەتتى سىيلىقتارعا يە بولعاندار ءوز قۋانىشتارىن جاسىرمادى. ءوڭىر تۇرعىندارى اكتسيانىڭ ۇيىمداستىرۋشىلارى – "نۇرسۇلتان نازارباەۆ" قورى مەن «دەگدار» قايىرىمدىلىق قورىنا شىنايى العىستارىن جەتكىزدى.
"نۇرسۇلتان نازارباەۆ" قورى اتقارۋشى ديرەكتورىنىڭ ورىنباسارى الكەي مارعۇلانۇلى مەملەكەتپەن قاتار قوعامدىق ۇيىمداردىڭ جۇمىسى دا بەلگىلى ءبىر دارەجەدە حالقىمىزدىڭ ءال-اۋقاتىن جاقسارتۋعا ءوز ۇلەسىن قوسۋ ءتيىس دەپ سانايدى.
- كورونوۆيرۋس پاندەمياسى كەزىندە كوپ ادامدار جۇمىستارىنان ايىرىلىپ قالدى. كوپ وتباسىلاردىڭ جالاقاسى بەلگىلى ءبىر مولشەردە قىسقارىپ، بۇل جاعداي ولاردىڭ الەۋمەتتىك ءال-اۋقاتىنا تىكەلەي اسەر ەتتى. وسى ورايدا ءبىز «ەلباسى جىلۋى» يدەياسىن قولعا الىپ، ونى قارقىندى جۇزەگە اسىرۋدامىز. بۇل قايىرىمدىلىق ءىس-شارا شىلدەنىڭ 10-15 دەيىن جالعاسىن تابادى. ەلباسىنىڭ ءوزى دە بۇل قوزعالىستىڭ باستاۋىنا باتاسىن بەرگەن ەدى. بۇل جۇمىس ەندى توقتاماي، جالعاسا بەرۋ كەرەك. ويتكەنى بۇل جوبا ادامدارعا سەنىم ۇيالاتىپ قانا قويماي، ولاردىڭ رۋحىن كوتەرىپ، قوعامنىڭ قامقورلىعىن سەزىنۋگە مۇمكىندىك بەرەدى،- دەپ مالىمدەدى ول.
«دەگدار» قورىنىڭ ديرەكتورى لاۋرا احمەتوۆا مالىمدەگەندەي، «ەلباسى جىلۋى» جوباسىنىڭ الەۋمەتتىك ءمان-ماڭىزى زور.
- جالپى، بۇل اكتسيا ەكىنشى رەت وتكىزىلىپ جاتىر، العاش رەت جوبا وسى جىلدىڭ ساۋىرىندە ۇيىمداستىرىلعان ەدى. وسى ۋاقىت ارالىعىندا ءبىز بۇل جوبانىڭ قوعام ءۇشىن قانشالىقتى ماڭىزدى ەكەندىگىنە كوز جەتكىزدىك. حالقىمىز ءوزارا كومەك بەرۋگە، قاجەت كەزدە قول ۇشىن سوزۋعا قاشاندا دايىن. بۇل يگى ءداستۇر حالقىمىزدىڭ بويىنداعى – اسىل قاسيەتتەردىڭ ءبىرى. وسى قۇندىلىقتاردىڭ نەگىزىندە «ەلباسى جىلۋى» جوباسى دۇنيەگە كەلدى. بۇل باستاما وزگە ۇيىمدارعا جانە بارشا قازاقستاندىقتارعا جارقىن ۇلگى بولىپ، مىندەتتى تۇردە جالعاسىن تابادى دەپ سەنەمىن. ءبىز ءاردايىم قامقورلىققا مۇقتاج، جۇرەك جىلۋىنا ءزارۋ جاندارعا كومەكتەسۋگا دايىنبىز،- دەدى لاۋرا احمەتوۆا.
ەسكە سالساق، الەۋمەتتىك تۇرعىدان وسال وتباسىلارعا تاراتىلاتىن ازىق-تۇلىك تاۋارلارىنىڭ جالپى سالماعى – 120 توننا. اۋقىمدىلىعى جاعىنان تەڭدەسى جوق اكتسيا ءالى دە جالعاسۋدا.
ءىس-شارانىڭ ۇيىمداستىرۋشىلارى – "نۇرسۇلتان نازارباەۆ" قورى مەن «دەگدار» قايىرىمدىلىق قورى، سونداي-اق جوباعا "LIDER KZ" ۆولونتەرلىك قوزعالىسىنىڭ مۇشەلەرى اتسالىسۋدا.
"ادىرنا" ۇلتتىق پورتالى.
