قوستانايدا ازىق-تۇلىك تاۋارلارىنىڭ باعاسى 6,1 پايىزعا ارتقان

997

بۇل تۋرالى وبلىس اكىمى ارحيمەد مۇحامبەتوۆ ورتالىق كوممۋنيكاتسيالار قىزمەتىندە وتكەن بريفينگتە ايتىپ بەردى دەپ حابارلايدى "ادىرنا" ۇلتتىق پورتالى.

ارحيمەد مۇحامبەتوۆ  قوستاناي وبلىسىنىڭ 2021 جىلدىڭ اعىمداعى كەزەڭىندەگى الەۋمەتتىك-ەكونوميكالىق دامۋى جايلى بايانداپ، جۋرناليستەردىڭ ساۋالدارىنا جاۋاپ بەردى.

ونىڭ ايتۋىنشا، جىل باسىنان بەرى قوستاناي وبلىسىنىڭ ونەركاسىپ كاسىپورىندارى 860,4 ملرد تەڭگەنىڭ ءونىمىن وندىرگەن. ەسەپتى كەزەڭدە ءوڭىر ەكونوميكاسىنا 117,0 ملرد تەڭگە ينۆەستيتسيا تارتىلىپتى.

جالپى وبلىس بويىنشا قۇنى 168,6 ملرد تەڭگەگە 97 ينۆەستيتسيالىق جوبا جۇزەگە اسىرىلعان. سونىڭ ارقاسىندا 6,5 مىڭ جۇمىس ورنى اشىلعان.

— وبلىستا اۋىل شارۋاشىلىعى ەكونوميكانىڭ ەكىنشى بازالىق باعىتى بولىپ ەسەپتەلەدى. ونىڭ ۇلەسى 12,5%-كە تەڭ. سالادا 117 مىڭنان استام ادام جۇمىس ىستەيدى. بۇل  — جۇمىسپەن قامتىلعان حالىقتىڭ جالپى سانىنىڭ 25 پايىزى. رەسپۋبليكا بويىنشا ءبىزدىڭ وبلىس ۇن ءوندىرىسى بويىنشا ءبىرىنشى، سارى ماي، ءسۇت جانە قويۋلاندىرىلعان ءسۇت وندىرۋدە ەكىنشى، يوگۋرت، ءسۇت جانە اشىتىلعان كىلەگەي، ماكارون ونىمدەرى ءوندىرىسى بويىنشا ءۇشىنشى ورىندا تۇر. بيىل ەت ءوندىرىسى 4,7 پايىزعا، ءسۇت ءوندىرىسى 2,5 پايىزعا ارتتى. جالپى، استىقتى ءوڭىر تاماق ونىمدەرى ءوندىرىسىنىڭ ەكسپورتى بويىنشا وتكەن جىلى رەسپۋبليكادا ءبىرىنشى ورىن العانىن اتاپ وتكەن ءجون، — دەدى ا.مۇحامبەتوۆ.

ول بريفينگ سوڭىندا جۋرناليستەر تاراپىنان وڭىردەگى اۆتوكولىك جولدارىن قالپىنا كەلتىرۋ، تۇرعىن ءۇي سالۋ، حالىقتى جۇمىسپەن قامتۋ، ءبىلىم بەرۋ، دەنساۋلىق ساقتاۋ سالاسىنداعى بىرقاتار ماسەلەلەر بويىنشا قويىلعان ساۋالدارعا جاۋاپ بەردى.

وبلىس اكىمىنە "ادىرنا" ۇلتتىق پورتالىنىڭ جۋرناليستەرى دە ءوز ساۋالىن ۇسىندى. "الەۋمەتتىك ماڭىزى بار تاۋارلار باعاسىنىڭ ءوسۋىن تەجەۋ ءۇشىن قانداي شارالار اتقارىلىپ جاتىر؟" دەگەن ساۋالعا ا.مۇحامبەتوۆ بىلاي دەپ جاۋاپ بەردى:

— بيىل وبلىستا تۇتىنۋ باعالارىنىڭ كورسەتكىشى 103,3 پايىزدى  قۇرادى (قازاقستان رەسپۋبليكاسىندا – 103,5 پايىز),  ونىڭ ىشىندە ازىق-تۇلىك تاۋارلارىنىڭ يندەكسى —  104,8 پايىز (قازاقستان رەسپۋبليكاسىندا – 104,9%). بيىلعى بەس ايدىڭ ىشىندە وڭىردە الەۋمەتتىك ماڭىزى بار 19 ازىق-تۇلىك تاۋارىنىڭ باعا يندەكسى 6,1 پايىزعا دەيىن ءوستى. بۇل ورتاشا كورسەتكىش دەپ ويلايمىز. سەبەبى قازىرگى تاڭدا قازاقستان رەسپۋبليكاسى بويىنشا بۇل كورسەتكىش 6,7 پايىزعا دەيىن جەتىپ وتىر. جالپى جىل قورىتىندىسى بويىنشا وڭىرلىك ءونىمنىڭ كەمىندە 3,0 پايىز ءوسىمىن كۇتۋدەمىز. جۋىردا باعاسى قىمباتتاعان كوكونىستەر، ونىڭ ىشىندە كارتوپ، ءسابىز باعالارى ءبىزدىڭ وبلىستا تۇراقتالىپ كەلەدى، اتاپ ايتساق، باعا ەسكپورتتىق باعالاردان تومەن.

 

"ادىرنا" ۇلتتىق پورتالى. 

 

پىكىرلەر
رەداكتسيا تاڭداۋى