اتىراۋدا كۇننىڭ ىستىعىندا اسفالتتا جۇمىرتقا قۋىرعان اسپازدىڭ ارەكەتى الەۋمەتتىك جەلىدە تالقىلانىپ جاتىر. بالا كەزىنەن اسپازدىققا قىزىققان باعدات قادىروۆ «ادىرنا» ۇلتتىق پورتالىنىڭ تىلشىسىنە ءمان-جايدى ءتۇسىندىرىپ بەردى.
«بۇل ۆيدەونى قىزىق ءۇشىن تۇسىرگەن بولاتىنمىن. كەڭىنەن تارالىپ كەتەدى دەپ ويلامادىم. وسىدان 3-4 كۇن بۇرىن اتىراۋدا 50˚س ىستىق بولدى. سول ىستىقتى پايدالانىپ، كۇننىڭ كوزىنە جۇمىرتقا ءپىسىرۋ دەگەن وي كەلدى. جۇمىرتقانى ارنايى جاروۆنيا تاباسىندا ءپىسىردىم. ول ىدىس تەز قىزىپ، بويىندا ىستىقتى ۇزاق ۇستاپ تۇرادى.
بۇل – بۇرىننان بار يدەيا. ۆيدەونى حالىقتىڭ اراسىندا كەڭ تاراسىن دەگەن ماقساتپەن تۇسىرگەن جوقپىن. تۇندە سالىنعان ۆيدەونى تاڭەرتەڭگە دەيىن 20-30 مىڭ ادام كورىپ ۇلگەرىپتى. ال بۇگىنگى كۇنى كورگەندەر سانى 100 مىڭعا دەيىن جەتىپ قالدى. كوپتەگەن پابليكتەردە دە ءجۇر. بۇل ۆيدەونى اتىراۋدىڭ ىستىعى قاتتى بولادى دەگەن ويمەن تۇسىرگەن بولاتىنمىن»، - دەيدى جاس اسپاز.
باعدات قادىروۆ حايپ جاساۋدى ماقسات ەتپەگەنىن دە ايتىپ ءوتتى.
بۇدان بولەك اسپازدان جۇمىسى تۋرالى، بۇل ماماندىقتىڭ «ەر ادامدارعا قيىندىق تۋعىزباي ما؟» ەكەنىن سۇراپ بىلدىك.
«بالا كەزدەن تاماق جاساۋعا يكەمىم بولدى. اسپاز بولۋىما مۇمكىن ءۇيدىڭ ۇلكەنى بولعانىم اسەر ەتكەن شىعار. بالا كەزدەگى ارمانىما اسپاز ماماندىعىنا كوللەدجگە ءتۇسۋ ارقىلى جاقىندادىم. وقۋدىڭ اراسىنداعى پراكتيكا كەزىندە تاماق پىسىرۋگە دەگەن قىزىعۋشىلىعىم ودان سايىن ارتتى. شەتەلدەردە دە جۇمىس جاساپ كوردىم. مىسالى، موسكۆا، دۋباي، سانكت-پەتەربۋرگ، ۋكراينا، تۇرىك ەلدەرىندە بولدىم. الماتىداعى بەدەلدى مەيرامحانالاردا دا، استانا قالاسىندا دا قىزمەت ەتتىم.
جۇمىستىڭ وڭايى جوق. اسپاز بولۋ ەر ادامعا قيىندىق تۋعىزبايدى. ەگەر وزىڭە ۇناعان ماماندىق بولسا، سول جۇمىستى ىستەپ جاتقاندا ءوزىڭىزدى باقىتتى سەزىنسەڭ، سونىڭ ءوزى ۇلكەن جەتىستىك. كەز كەلگەن جۇمىستى ادام شىنايى نيەتپەن جاساسا، باقىت دەگەن سول. وسى سالادا كەلە جاتقانىما 12 جىلدان استى. باستاپقى 9-10 جىلىم تەك ەڭبەكتەنۋمەن ءوتتى. ال كەيىنگى 2 جىلدا الەۋمەتتىك جەلىلەردە بەلسەندى بولىپ، حالىقتىڭ اراسىندا تانىلا باستادىم»، - دەيدى ول.
ۆيدەونى وسى سىلتەمە بويىنشا كورە الاسىز: https://www.instagram.com/bagdat_cook/?utm_source=ig_embed&ig_rid=c36ae2b4-ea2c-48b9-ac92-bf947e14e09b
اقمارال بەرەكەت،
"ادىرنا" ۇلتتىق پورتالى
