قاباتوۆتىڭ ايماعامبەتوۆ تۋرالى ازىلىنە مينيسترلىك جاۋاپ بەردى

4382
Adyrna.kz Telegram

تۇرسىنبەك قاباتوۆتىڭ مينيستر اسحات ايماعامبەتوۆتىڭ ۆاكتسينا الۋىنا قاتىستى قالجىڭىنا ءبىلىم جانە عىلىم مينيسترلىگى جاۋاپ بەردى، دەپ حابارلايدى «ادىرنا» ۇلتتىق پورتالى Tengrinews.kz سايتىنا سىلتەمە جاساپ.

بىرنەشە اي بۇرىن تۇرسىنبەك قاباتوۆ كونتسەرتتەرىنىڭ بىرىندە شەندىلەردىڭ اراسىنان QazVac قازاقستاندىق ۆاكتسيناسىن العاشقى بولىپ نەگە ءبىلىم جانە عىلىم ءمينيسترى اسحات ايماعامبەتوۆ سالدى ەكەن دەيدى. قالجىڭداپ ۆاكتسينانى ءبىرىنشى بولىپ كىم الاتىنىن ۇكىمەت وتىرىسىندا قالاي انىقتاعانىن ويلاپ كورەدى.

«مەنىڭ ويىمشا، تامىزعا دەيىن پرەزيدەنت بارلىعىن جيناپ بىلاي دەدى: «ءبىز مىناداي ۆاكتسينا شىعاردىق. ەندى حالىقتان ەمەس، وزىمىزدەن باستايىق». سوندا دەپۋتاتتار بىلاي دەيدى: «جوق، بىزدە جاقىندا سايلاۋ، ۇگىت-ناسيحات جۇرگىزۋ كەرەك. ۋاقىتىمىز جوق»، ال اكىمدەر: «بىزدە جىلىتۋ ماۋسىمى، جاقىندا قىس. ءبىز ۆاكتسينا الا المايمىز. ودان دا مينيسترلەر باستاسىن». اۋىل شارۋاشىلىعى ءمينيسترى ايتادى: «جاقىندا ەگىستىك جينايمىن. ماسەلەم وتە كوپ». ارالارىنداعى ەڭ جاسى ايماعامبەتوۆ وتىر. ءبارى ايماعامبەتوۆكە قاراپ، ويلاعان شىعار: «ءبارىبىر بالالار ۇيدەن، ونلاين وقىپ جاتىر. ستۋدەنتتەر دە ۇيدە. ودان دا سەنەن باستايىق. سەن دە قاشىقتان جۇمىس ىستەيسىڭ».

جاقىندا وسى ءۇزىندى Tik Tok جەلىسىندە تانىمال بولا باستادى. ۆيدەو 185 مىڭنان اسا قارالىم مەن 7 مىڭ لايك جيناعان.

رەداكتسيامىز ءمينيستردىڭ ءباسپاسوز-حاتشىسى ءمولدىر ابدۋاليەۆادان ايماعامبەتوۆتىڭ نەلىكتەن العاش بولىپ ۆاكتسينا العانىن سۇرادى.

«Tik Tok جەلىسىندە مينيسترلەر كابينەتىنەن اسحات ايماعامبەتوۆتىڭ نەلىكتەن العاش بولىپ ۆاكتسينا سالدىرعانى جايلى قالجىڭ ارالاس ساۋالدىڭ ۆيدەوسى تاراي باستادى. ەسكە سالايىق، پرەزيدەنت قاسىم-جومارت توقاەۆ QazVac ۆاكتسيناسىنىڭ ءوندىرىسىن عانا ەمەس، قولدانىسقا ەنۋىن دە قولداۋدى تالاپ ەتكەن. ۆاكتسينانى ءبىلىم جانە عىلىم مينيسترلىگى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ قىزمەتكەرلەرى جاسادى. مينيستر باسىنان ۆاكتسينانىڭ جاسالۋىنا جەتەكشىلىك ەتتى. سوندىقتان كلينيكالىق زەرتتەۋلەردەن بۇرىن ازىرلەۋشى-عالىمدار ۆاكتسينا سالدىرۋ جايلى شەشىم جاساعان، ول وتاندىق ۆاكتسينانى الۋعا بەل بايلادى. وسىلايشا ءوز ارىپتەستەرىنە قولداۋ كورسەتىپ، دەنساۋلىعىن دا قورعادى»، – دەدى ءباسپاسوز-حاتشىسى.

ءبىلىم جانە عىلىم مينيسترلىگىندەگىلەر اسحات ايماعامبەتوۆتىڭ ءبىر جىل بۇرىن ۆاكتسينا العانىن جانە ەشقانداي جاناما اسەرى بولماعانىن ايتتى. سونىمەن قاتار، ءمينيستردىڭ اعزاسىندا انتيدەنەلەر مولشەرىنىڭ جوعارى ەكەنىن دە قوستى.

«ايتپاقشى، ناۋرىزدا مينيستر ءدال سول ۆاكتسينانىڭ ەكىنشى دوزاسىن سالدىردى. ءوزىن بىرقالىپتى سەزىنەدى، جاناما اسەر جوق. ءبىلىم جانە عىلىم ءمينيسترى قازاقستاندىقتاردى وزدەرىن كۇتۋگە جانە COVID-19-عا قارسى ۆاكتسينا سالدىرۋعا شاقىرادى. ول ءوز ارەكەتى ارقىلى وتاندىق عىلىم مەن عالىمدارعا سەنەتىنىن كورسەتتى»، – دەدى ءمولدىر ابدۋاليەۆا.

اسحات ايماعامبەتوۆ COVID-19-عا قارسى وتاندىق ۆاكتسينانى العاش بولىپ 2020 جىلدىڭ تامىزىندا سالدىرعان ەدى.

"ادىرنا" ۇلتتىق پورتالى

پىكىرلەر