تۇرعىندارعا سىياقى بەرىلەدى

762

اقتوبەدە قالالىق اكىمدىك جانىنان قوعامدىق قور قۇرىلىپ، ۆانداليزمگە قاتىستى دايەكتەر مەن دەرەكتەردى جەتكىزگەن تۇرعىندارعا سىياقى بەرۋ جاعى قاراستىرىلۋدا دەپ حابارلايدى "ادىرنا" ۇلتتىق پورتالىنىڭ ءتىلشىسى.

سوڭعى جىلدارى اقتوبەدە قوعامدىق مۇلىكتى ءبۇلدىرۋ، ۇرلاۋ دەرەكتەرى كوبەيگەن. زاڭ بۇزۋشىلىق جاساعاندار جازادان قۇتىلىپ كەتىپ جاتىر. وسىعان وراي قالا اكىمدىگى باستاما كوتەرىپ،  بۇعان جەرگىلىكتى كاسىپكەرلەر قولداۋ تانىتىپ وتىر. اتالعان جوبا قولعا الىنسا، الداعى ۋاقىتتا قوعامدىق ورىنداردا قالا مۇلكىن ۇرلاعاندار مەن بۇلدىرگەندەر قاتاڭ جازالانىپ، ءتارتىپ كۇشەيمەك.

— جۋىردا مەملەكەت باسشىسى قاسىم-جومارت توقاەۆ ۆانداليزمگە قاتىستى ءوز پىكىرىن بىلدىرگەن بولاتىن. ءبىز مۇنى وتە ورىندى دەپ بىلەمىز. وسى ورايدا قالامىزدا تۇرعىنداردىڭ ءىس-ارەكەتتەرىن كورە وتىرىپ، بولاشاقتا ايىپپۇل مەن كەلتىرىلگەن زالال قۇنىنىڭ كولەمى ارتادى. ءبىز وسى ماقساتتا جۇمىس توبىن قۇرىپ جاتىرمىز. ەگەر قالا مۇلكىن ۇرلاپ نەمەسە بۇلدىرگەندەر انىقتالسا، بۇل تۋرالى تۇرعىندار بىزگە شۇعىل تۇردە حابارلايتىن بولسا، جاۋاپتى مەكەمەلەر قاماۋ، ايىپپۇل تولەۋ ماسەلەسىن قولعا الاتىن بولادى. ۆانداليزممەن ەل بولىپ كۇرەسەتىن ۋاقىت كەلدى دەپ ويلايمىن. سەبەبى سوڭعى كەزدە مەملەكەت قارجىسىنا سالىنعان نىساندار مەن قوعامدىق ورىنداردا تارتىپسىزدىك ءىس-ارەكەتتەرگە ءجيى جول بەرىلەتىن بولدى. ەگەر ءبىز قالامىزدىڭ تازا بولعانىن، ورتاق مۇلىكتەردىڭ ۇقىپتى ساقتالۋىن قالايتىن بولساق، تۇرعىنداردى تارتىپكە شاقىرۋىمىز كەرەك. زاڭدى تۇردە تالاپتى كۇشەيتىپ، ۆانداليزم ارەكەتتەرىن حابارلاعان ادامعا سىياقى تاعايىنداۋ الگوريتمىن ايقىنداۋىمىز كەرەك، — دەدى قالا اكىمى ا.شاحاروۆ اتالعان ماسەلەگە قاتىستى ويىن ءبىلدىرىپ.

ايتا كەتۋ كەرەك،  جۇمىس توبىنىڭ مۇشەلەرى الداعى ۋاقىتتا زاڭسىز ارەكەتتەردى پوليتسياعا جەتكىزۋ ءۇشىن فوتو، ۆيدەو ايعاقتاردى ۇسىنۋ جولدارىن جانە تولەنەتىن سىياقى كولەمىن انىقتاۋدى قولعا الماق. سونداي-اق اقتوبەدە بۇل ماسەلەنىڭ الدىن الۋ ءۇشىن قالا شەتىندەگى كوشەلەرگە بەينەكامەرالار ورناتىلىپ، قاراڭعى اۋماقتار جارىقتاندىرىلادى. 

 

"ادىرنا" ۇلتتىق پورتالى.

پىكىرلەر
ۇقساس جاڭالىقتار