اتىراۋ وبلىسىنىڭ اكىمى ماحامبەت دوسمۇحامبەتوۆ ءبىلىم ساپاسىن كوتەرۋ جۇمىستارىن كۇشەيتۋگە تاپسىرما بەردى.
وبلىس اكىمى ماحامبەت دوسمۇحامبەتوۆتىڭ توراعالىعىمەن بەينەرەجيمدە وتكەن سەلەكتورلىق كەڭەستە ءبىلىم بەرۋ جۇيەسىندەگى مىندەتتەردى ورىنداۋ جانە وزگە دە ماسەلەلەردى شەشۋ جولدارى قاراستىرىلدى.
ءبىلىم بەرۋ باسقارماسىنىڭ باسشىسى ساتقان ەسەنعاليەۆتىڭ سوزىنشە، وبلىستا سانيتارلىق-ەپيدەميولوگيالىق جاعداي ساقتالا وتىرىپ، ءبىلىم بەرۋ ۇيىمداستىرىلدى. قاشىقتان وقىتۋ بارىسىندا تۋىنداعان ماسەلەلەر دەر كەزىندە شەشىمىن تاۋىپ، قىسقا مەرزىمدە جولعا قويىلدى. وبلىس ءبىلىم بەرۋدى تسيفرلاندىرۋ باعىتىنداعى تاپسىرمالاردى ورىنداۋدا كوش باسىندا ەكەن. دەسە دە، ءبىلىم ساپاسىنا قاتىستى پروبلەمالار جەتەرلىك.
– ال، ۇلتتىق بىرىڭعاي تەستىلەۋدىڭ قورىتىندىسى بويىنشا بيىل ءبىلىم ساپاسى 57,3 %-دى قۇرادى. وكىنىشكە قاراي، فۋنكتسيونالدى ساۋاتتىلىققا بايلانىستى حالىقارالىق زەرتتەۋلەر (PISA) بويىنشا وبلىس وقۋشىلارى رەسپۋبليكادا ەڭ تومەن ناتيجەگە يە. حالىقارالىق ولشەم بولىپ تابىلاتىن ساۋاتتىلىقتىڭ ءۇش باعىتى بويىنشا 2018 جىلدىڭ كورسەتكىشتەرى ورتاشا ناتيجەدەن دە تومەن. فۋنكتسيونالدىق تۇرعىدان ساۋاتسىز وقۋشىلاردىڭ 84%-ى ءبىزدىڭ وبلىستىڭ ۇلەسىندە بولىپ تۇر. ال، وبلىستاعى وقۋشىلاردىڭ 60%-ى ەكىنشى جانە ودان دا جوعارى دەڭگەيدەگى تاپسىرمالاردى ورىنداي المايدى. بۇدان باسقا دا ءبىلىم ساپاسىنا قاتىستى كورسەتكىشتەر سوڭعى جىلداردا تومەندەپ كەتكەن، – دەدى ءبىلىم بەرۋ باسقارماسىنىڭ باسشىسى.
ايماق باسشىسى وزەكتى ماسەلەگە بايلانىستى ءوز دەڭگەيىندە جۇمىس اتقارماي وتىرعان ءتيىستى ورگانداردى سىنعا الدى. سوسىن ءبىلىم ساپاسىن ارتتىرۋ ءۇشىن ازىرلەنگەن جول كارتاسىنىڭ جۇزەگە اسىرىلۋ بارىسىن سۇرادى.
«ءسىزدىڭ تاپسىرماڭىزبەن ازىرلەنگەن «اتىراۋ وبلىسىندا ءبىلىم بەرۋدى دامىتۋدىڭ 2021-2023 جىلدارعا ارنالعان جول كارتاسى» باعدارلاما رەتىندە ءساۋىر ايىندا كوپشىلىككە تانىستىرىلدى. بۇگىندە وبلىستىق ءبىلىم بەرۋ باسقارماسى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمدارىمەن بىرلەسە جۇزەگە اسىرۋدا. «جول كارتاسى» اياسىندا 3 ايدىڭ ىشىندە ءبىراز اۋقىمدى جۇمىس جاسالدى. اتاپ ايتساق، «جول كارتاسى» نىسانى رەتىندە وبلىس اۋماعىنداعى 50 مەكتەپ زەردەلەندى. كەشەندى زەرتتەۋ ناتيجەلەرى بويىنشا اتىراۋلىق مەكتەپتەردەگى ءبىلىم بەرۋ پروبلەمالارى تولىقتاي انىقتالدى. ماماندارىمىز جوعارىدا اتالعان پروبلەمالاردى جول كارتاسى بىرتىندەپ شەشەتىنىن بولجاپ وتىر»، – دەپ ءتۇسىندىردى باسقارما باسشىسى ساتقان ەسەنعاليەۆ.
سونداي-اق، «جول كارتاسى» اياسىندا بالالار مەن اتا-انالار قارىم-قاتىناسىن جولعا قويۋ، قاۋىپسىز ءبىلىم بەرۋ ورتاسىن قۇرۋ، قيىن ومىرلىك جاعدايداعى وقۋشىلارعا كومەك كورسەتۋ، ءوز-وزىنە قول جۇمساۋدىڭ الدىن-الۋ، باسقا دا وزەكتى ماسەلەلەردى جولعا قويۋ قاراستىرىلعان.
ءبىلىم سالاسىنداعى مامان جەتىسپەۋشىلىكتى شەشۋ ءۇشىن ماماندار دايارلاۋعا وبلىس اكىمىنىڭ گرانتتارى ءبولىنىپ كەلەدى. جيىن سوڭىندا وقۋشىلاردىڭ ءبىلىم ساپاسىنىڭ جوعارى بولۋى بۇگىنگى كۇننىڭ باستى مىندەتى ەكەنىن العا تارتقان وبلىس اكىمى ماحامبەت دوسمۇحامبەتوۆ جاۋاپتى سالا باسشىلارىنا بىرقاتار تاپسىرما جۇكتەدى.
