25 ماۋسىمدا الەۋمەتتىك جەلىدە الينا نۇرتاس سەنات دەپۋتاتى تالعات مۇساباەۆ وعان كۇش قولداندى دەپ ايىپتاعان. بۇل تۋرالى “ادىرنا” ۇلتتىق پورتالى Orda.kz سايتىنا سىلتەمە جاساپ حابارلايدى.
بويجەتكەننىڭ ايتۋىنشا، سەنات دەپۋتاتى سىرتتا يتىمەن سەرۋەندەپ جۇرگەندە ونى بالاعاتتاپ، قول كوتەرگەن. بىراق تالعات مۇساباەۆتىڭ ءوزى بارلىعىن جوققا شىعارىپ وتىر.
27 ماۋسىم ەلوردانىڭ تاعى ءبىر تۇرعىنى تالعات مۇساباەۆتىڭ ۇستامسىزدىعىنا شاعىمداندى.
ءاليا ءابدىبايىتوۆانىڭ ايتۋىنشا، الينا نۇرتاسقا شابۋىل جاسالعان ساياباقتا بىلتىر قىستا اۋتيزممەن اۋىراتىن بالاعا كۇش كورسەتىلگەن.
– قىستا ترياتلون پاركىندە يتپەن قىدىرىپ جۇرگەن امىرگە ەر ادام اگرەسسيا كورسەتكەن. ول ۇيگە كەلگەسىن ەر ادامنىڭ وعان ۇرسىپ، بالاعاتتاپ، يتەرىپ جىبەرگەنىن ايتتى. بۇل جاعدايعا بالانىڭ قولىنداعى كىشكەنتاي يت سەبەپ بولعان، – دەپ جازدى ءابدىبايىتوۆا Instagram-پاراقشاسىندا.
انىقتالعانداي، ءامىر ەسىمدى بالا اۋتيزممەن اۋىرادى. سوندىقتان ول سەنات دەپۋتاتىنا سول جەردە جاۋاپ بەرە الماعان.
– مەن ءامىردىڭ وتىرىك ايتپايتىنىن بىلەمىن. بۇگىن قۇربىم ترياتلون پاركىندە وسى ادامنىڭ قاتىسۋىمەن بولعان وقيعا تۋرالى جازىلعان ماقالانى جىبەردى. مەن امىرگە ەر ادامنىڭ سۋرەتىن كورسەتتىم، ول ءوزىن بوقتاپ، يتەرىپ جىبەرگەن ەر ادامدى تانىدى، – دەدى ەلوردا تۇرعىنى.
سەنات دەپۋتاتى تالعات مۇساباەۆتىڭ ادۆوكاتى سۇڭقار نۇرماعامبەتوۆ «اقپاراتتى تەكسەرۋ كەرەك» دەپ مالىمدەدى.
