25 maýsymda áleýmettik jelide Alına Nurtas senat depýtaty Talǵat Musabaev oǵan kúsh qoldandy dep aıyptaǵan. Bul týraly “Adyrna” ulttyq portaly Orda.kz saıtyna silteme jasap habarlaıdy.
Boıjetkenniń aıtýynsha, senat depýtaty syrtta ıtimen serýendep júrgende ony balaǵattap, qol kótergen. Biraq Talǵat Musabaevtyń ózi barlyǵyn joqqa shyǵaryp otyr.
27 maýsym elordanyń taǵy bir turǵyny Talǵat Musabaevtyń ustamsyzdyǵyna shaǵymdandy.
Álııa Ábdibaıytovanyń aıtýynsha, Alına Nurtasqa shabýyl jasalǵan saıabaqta byltyr qysta aýtızmmen aýyratyn balaǵa kúsh kórsetilgen.
– Qysta trıatlon parkinde ıtpen qydyryp júrgen Ámirge er adam agressııa kórsetken. Ol úıge kelgesin er adamnyń oǵan ursyp, balaǵattap, ıterip jibergenin aıtty. Bul jaǵdaıǵa balanyń qolyndaǵy kishkentaı ıt sebep bolǵan, – dep jazdy Ábdibaıytova Instagram-paraqshasynda.
Anyqtalǵandaı, Ámir esimdi bala aýtızmmen aýyrady. Sondyqtan ol senat depýtatyna sol jerde jaýap bere almaǵan.
– Men Ámirdiń ótirik aıtpaıtynyn bilemin. Búgin qurbym trıatlon parkinde osy adamnyń qatysýymen bolǵan oqıǵa týraly jazylǵan maqalany jiberdi. Men Ámirge er adamnyń sýretin kórsettim, ol ózin boqtap, ıterip jibergen er adamdy tanydy, – dedi elorda turǵyny.
Senat depýtaty Talǵat Musabaevtyń advokaty Suńqar Nurmaǵambetov «aqparatty tekserý kerek» dep málimdedi.
