شىمكەنت قالاسىنىڭ اكىمى مۇرات ايتەنوۆتىڭ توراعالىعىمەن وتكەن ينۆەستيتسيالىق شتابتىڭ كەزەكتى وتىرىسىندا بىرقاتار ماسەلەلەر قارالدى.
«ZOOM» پلاتفورماسى بويىنشا وتكەن جيىنعا شىمكەنت قالاسىنىڭ كاسىپكەرلەر پالاتاسى وڭىرلىك كەڭەستىڭ توراعاسى قايرات مولداسەيىتوۆ، قالالىق كاسىپكەرلەر پالاتاسىنىڭ ديرەكتورى نۇرلان قابىشتاەۆ، «Kanfar Building» جشس، «بەك ستروي سەرۆيس» جشس، «Umit Qala» (BI Group) جشس، «يۋگ PLASTIC KZ» جشس، «ماريام اي» جشس، ت.ب مەكەمەلەردىڭ باسشىلارى قاتىستى.
ينۆەستيتسيالىق شتاب وتىرىسىندا 2021 جىلدىڭ قاڭتار-مامىر ايلارىندا نەگىزگى كاپيتالعا سالىنعان ينۆەستيتسيالار جانە 2021 جىلعى قاڭتار-ماۋسىم ايلارىنا بولجام، جاڭا جوبالار مەن جوبالاردىڭ وزەكتى ماسەلەلەرى جانە حاتتامالىق تاپسىرمالاردىڭ ورىندالۋ بارىسى تالقىلاندى.
الدىمەن قالالىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى بەرەكە دۇيسەبەكوۆ 2021 جىلدىڭ بەس ايىنداعى نەگىزگى كاپيتالعا سالىنعان ينۆەستيتسيالاردىڭ ورىندالۋ بارىسىن باياندادى.
باسقارما باسشىسىنىڭ ايتۋىنشا، جىل باسىندا جوسپار 89,2 ملرد تەڭگە بولاتىن. بەس ايدىڭ قورىتىندىسىنا سايكەس، نەگىزگى كاپيتالعا سالىنعان ينۆەستيتسيالار بويىنشا 93,2 ملرد تەڭگە يگەرىلدى. وتكەن جىلدىڭ ءتيىستى كەزەڭىمەن سالىستىرعاندا بۇل كورسەتكىش ناقتى 20,7 %-عا ارتىپ وتىر.
اتاپ ايتقاندا، جاڭعىرتۋ جوبالارى، «وڭتۇستىك» اەا، «وڭتۇستىك» يا، «تاسساي» يا، «شىمكەنت» اكك» اق ارقىلى جۇزەگە اسىرىلاتىن جوبالار، ساۋدا، كولىك جانە الەۋمەتتىك سالالارعا باعىتتالعان جوبالار بويىنشا ينۆەستيتسيالار يگەرىلدى.
شتاب وتىرىسىندا «شىمكەنت» اكك» اق باسقارما توراعاسى ب.كانكين جانە ينۆەستورلار جاڭا جوبالارىن ۇسىنىپ، سول جوبالار بويىنشا وزەكتى ماسەلەلەردى تالقىعا سالدى.
اتاپ ايتار بولساق، جيىنعا قوسىلعان «يۋگ PLASTIC KZ» جشس ديرەكتورى ازيزبەك تۋرديەۆ ءونىم تۇرلەرىن ۇلعايتۋ، جاڭا باعىتتار قوسۋدى جوسپارلاعانىن مالىمدەي كەلە قۇرىلىس ماتەريالدارىنا ماماندانعان ءوندىرىس ورنىنا قوسىمشا جەر قاجەتتىگىن جەتكىزدى. ءدال وسىنداي ماسەلەنى «ماريام اي» جشس كولىكتەردىڭ قوسالقى بولشەكتەرىن شىعاراتىن كاسىپورىن باسشىلىعى دا كوتەردى. مەكەمە باسشىسى فارابي ءابۋوۆ «جۇلدىز» يندۋستريالدى ايماعىنان جەر بەرۋدى سۇرادى. سونىمەن بىرگە، «كدل وليمپ» جشس دا ءوز وندىرىستەرىن ۇلعايتۋدى جوسپارلاپ وتىرعاندىعىن ايتتى.
جيىندا «شىمكەنت» اكك» اق باسقارما توراعاسى باۋىرجان كانكيننىڭ بارلىق ۇسىنىستارى حاتتاماعا ەنگىزىلىپ، تاپسىرما بەرىلدى. جەكە كاسىپكەرلەردىڭ وتىنىشتەرى بويىنشا جەر بەرۋ ماسەلەسى دە شەشىمىن تابادى. سونداي-اق، وتكەن شتاب وتىرىستارىندا بەرىلگەن تاپسىرمالاردىڭ ورىندالۋ بارىسى دا پىسىقتالدى.
شىمكەنت قالاسى اكىمدىگىنىڭ ءباسپاسوز قىزمەتى
