بيىل كامەلەتكە تولماعان 14 بالاعا قاتىستى ەڭبەك زاڭناماسىن بۇزۋ دەرەكتەرى انىقتالعان دەپ حابارلايدى "ادىرنا" ۇلتتىق پورتالى.
جۇمىس بەرۋشىلەر ەڭبەك شارتىن جاساماستان 14 ءجاسوسپىرىمدى جۇمىسقا تارتىپ، ولار كۇنى بويى ەڭبەك ەتكەن. مۇنداي دەرەكتەر بالالار ەڭبەگىن قاناۋعا قارسى ۇلتتىق اقپاراتتىق ناۋقان بارىسىندا انىقتالدى.
ءىس-شارا شەڭبەرىندە بالالار ەڭبەگىن قاناۋ ماسەلەسى جانە بۇل پروبلەمانىڭ بالا مەن قوعام ءۇشىن تيگىزەتىن سالدارى تۋرالى ءتۇسىندىرۋ جۇمىستارى، ازاماتتاردى حاباردار ەتۋ شارالارى جۇرگىزىلدى.
«اقپاراتتىق ناۋقان ەلىمىزدىڭ بارلىق وڭىرىندە جۇرگىزىلدى. ءتۇسىندىرۋ جۇمىستارى بارىسىندا تۇركىستان، قاراعاندى جانە اقمولا وبلىستارىندا بالالار ەڭبەگىن زاڭسىز پايدالانۋ فاكتىلەرى انىقتالدى. ءدامحانادا داياشى جانە قۇرىلىس الاڭدارىندا جۇمىسشى بولىپ ەڭبەك ەتكەن ون ءتورت ءجاسوسپىرىمنىڭ قۇقىعى بۇزىلدى. جۇمىس بەرۋشىلەر ولاردى زاڭسىز نەگىزدە تولىق جۇمىسقا تارتقان. زاڭ بويىنشا 14 پەن 18 جاس ارالىعىنداعى كامەلەتكە تولماعاندار ءۇشىن قىسقارتىلعان جۇمىس ۋاقىتى بەلگىلەنۋى كەرەك. سونداي-اق جاسوسپىرىمدەرمەن جانە ولاردىڭ اتا-انالارىمەن ەڭبەك شارتتارى جاسالماعان»،– دەدى قر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ەسەنعازى يمانعاليەۆ.
بالالاردى ەڭبەككە زاڭسىز تارتۋ دەرەكتەرى انىقتالعاننان كەيىن جۇمىس بەرۋشىلەرمەن جانە كامەلەتكە تولماعانداردىڭ اتا-انالارىمەن ءتۇسىندىرۋ جۇمىستارى جۇرگىزىلدى.
قر ەڭبەك زاڭناماسىنا سايكەس، ون ءتورت جاسقا تولعان وقۋشىلارعا وقۋدان بوس ۋاقىتتا دەنساۋلىعىنا زيان كەلتىرمەيتىن جۇمىستاردى ورىنداۋعا رۇقسات ەتىلەتىنىن ايتا كەتكەن ءجون. 14-16 جاس ارالىعىنداعى بالالار اپتاسىنا 24 ساعاتتان، 16-18 جاستاعى جاسوسپىرىمدەر اپتاسىنا 36 ساعاتتان ارتىق جۇمىس ىستەمەۋى كەرەك. بۇل رەتتە، جۇمىس بەرۋشى كامەلەتكە تولماعان بالانىڭ وزىمەن، ونىڭ اتا-اناسىمەن، قامقورشىسىمەن نەمەسە بالا اسىراپ العان اتا-انامەن ەڭبەك شارتىن جاساۋعا مىندەتتى.
"ادىرنا" ۇلتتىق پورتالى.
