Bıyl kámeletke tolmaǵan 14 balaǵa qatysty eńbek zańnamasyn buzý derekteri anyqtalǵan dep habarlaıdy "Adyrna" ulttyq portaly.
Jumys berýshiler eńbek shartyn jasamastan 14 jasóspirimdi jumysqa tartyp, olar kúni boıy eńbek etken. Mundaı derekter balalar eńbegin qanaýǵa qarsy ulttyq aqparattyq naýqan barysynda anyqtaldy.
Is-shara sheńberinde balalar eńbegin qanaý máselesi jáne bul problemanyń bala men qoǵam úshin tıgizetin saldary týraly túsindirý jumystary, azamattardy habardar etý sharalary júrgizildi.
«Aqparattyq naýqan elimizdiń barlyq óńirinde júrgizildi. Túsindirý jumystary barysynda Túrkistan, Qaraǵandy jáne Aqmola oblystarynda balalar eńbegin zańsyz paıdalaný faktileri anyqtaldy. Dámhanada daıashy jáne qurylys alańdarynda jumysshy bolyp eńbek etken on tórt jasóspirimniń quqyǵy buzyldy. Jumys berýshiler olardy zańsyz negizde tolyq jumysqa tartqan. Zań boıynsha 14 pen 18 jas aralyǵyndaǵy kámeletke tolmaǵandar úshin qysqartylǵan jumys ýaqyty belgilenýi kerek. Sondaı-aq jasóspirimdermen jáne olardyń ata-analarymen eńbek sharttary jasalmaǵan»,– dedi QR Bilim jáne ǵylym mınıstrligi Balalardyń quqyqtaryn qorǵaý komıtetiniń tóraǵasy Esenǵazy Imanǵalıev.
Balalardy eńbekke zańsyz tartý derekteri anyqtalǵannan keıin jumys berýshilermen jáne kámeletke tolmaǵandardyń ata-analarymen túsindirý jumystary júrgizildi.
QR Eńbek zańnamasyna sáıkes, on tórt jasqa tolǵan oqýshylarǵa oqýdan bos ýaqytta densaýlyǵyna zııan keltirmeıtin jumystardy oryndaýǵa ruqsat etiletinin aıta ketken jón. 14-16 jas aralyǵyndaǵy balalar aptasyna 24 saǵattan, 16-18 jastaǵy jasóspirimder aptasyna 36 saǵattan artyq jumys istemeýi kerek. Bul rette, jumys berýshi kámeletke tolmaǵan balanyń ózimen, onyń ata-anasymen, qamqorshysymen nemese bala asyrap alǵan ata-anamen eńbek shartyn jasaýǵa mindetti.
"Adyrna" ulttyq portaly.
