قىزىلوردا وبلىسىنداعى 500-دەن استام مال ارام ولگەن ارال اۋدانىندا توتەنشە جاعداي جاريالاندى. وڭىردەگى توپىراقتىڭ قۇنارسىزدىعى، مالدىڭ اشتىقتان قىرىلعاندىعى سىناما ناتيجەسىمەن راستالدى. ايماقتا جەم-ءشوپ باعاسى كۇننەن كۇنگە شارىقتاپ بارادى. بۇل شارۋالاردىڭ جۇمىسىن شاتقاياقتاتۋدا، دەپ حابارلايدى «استانا» تەلەارناسى.
ايماقتا مال ازىعىنىڭ باعاسى اسپانداپ تۇر. بيىل جەم-شوپكە مەملەكەت تاراپىنان بەرىلەتىن سۋبسيدياعا قول جەتكىزۋ قيىنداعان. قوردالانعان ماسەلە شارۋالاردىڭ شىمبايىنا باتىپ تۇر.
«قازىر جوڭىشقا قىمباتتاپ جاتىر. 600-700 دەن جوڭىشقا تابىلماي وتىر. كەلەسى ورىم 800 تەڭگەدەن دەيدى. 3-ءشى ورىمدا بىزگە بەرسە 1000-1100 تەڭگەدەن بولادى. ارالدىڭ وزىندە قازىر 1200-1400 تگ بولىپ تۇر. بيىل مال قاتتى اۋىرىپ، ءولىپ جاتىر. كەشە دە مالىمىز ءولدى، قىستا ءبىراز شىعىنعا ۇشىرادىق. قازىر تاعى شىعىنعا ۇشىراپ جاتىرمىز»، - دەيدى شارۋاشىلىق توراعاسى نۇرلان بيمانوۆ.
بيىل سۋدىڭ تاپشىلىعىنا بايلانىستى ءشوپتىڭ شىعىمى تومەن. اسىرەسە، ارال وڭىرىندە جاعداي قيىن. كوككە اۋزى تيمەگەن ءتورت تۇلىك كوتەرەم بوپ، 500-دەن استامى ارام ءولدى. ولاردان سىناما العان ماماندار مالدىڭ اۋرۋدان ەمەس، اشتىقتان قىرىلعانىن راستاپ وتىر.
«مال ىشەتىن قۇدىقتاردان جانە قوسىمشا كولدەردەن سىنامالار الىندى. ودان بولەك، جىلقىلاردان، ولگەن جانە ءمۇيىزدى ءىرى قارادان سىناما الىندى. وبلىستىق ۆەتەريناريالىق زەرتحاناعا تاپسىرىلدى. سول تەرىس ناتيجە كورسەتتى. ياعني ەپيزووتيالىق احۋال تۇراقتى. اۋرۋ جوق. قۋاڭشىلىققا بايلانىستى، سوڭعى جىلدارى جاۋىن-شاشىننىڭ از، قىستىڭ قارسىز بولۋىنا بايلانىستى مال وتە كۇيسىز تۇسكەن. سونىڭ ەسەبىنەن بولىپ وتىر»، - دەدى وبلىستىق ۆەتەريناريا باسقارماسىنىڭ باسشىسى شاحماردان قويشىباەۆ.
بۇگىننەن باستاپ ارال اۋدانى بويىنشا توتەنشە جاعداي جاريالاندى. بىراق ماماندار مال شىعىنى وتەلمەيدى دەيدى. ال ارنايى بولىنگەن قارجى ءبىرىنشى كەزەكتە، اشتىقتان تەڭسەلگەن ءتورت تۇلىكتىڭ جەم-ءشوپ تاسىمالىنا قاجەتتى جانار-جاعارمايعا جۇمسالماق. جانە جايىلىمداردا بىتەلگەن سۋاتتاردىڭ كوزىن اشۋ جۇمىستارى قولعا الىنادى.
