قر پرەمەر-ءمينيسترىنىڭ ورىنباسارى ەرالى توعجانوۆ «قازاقستاندا ءۇندى شتامىنا بايلانىستى لوكداۋن جاريالانۋى مۇمكىن بە؟» دەگەن سۇراققا جاۋاپ بەردى، دەپ حابارلايدى قازاقپارات.
ەرالى توعجانوۆ قر پرەزيدەنتى جانىنداعى ورتالىق كوممۋنيكاتسيالار قىزمەتىندە تىلشىلەردىڭ سۇراعىنا جاۋاپ بەرۋدە.
«بۇگىنگى كۇنى رەسپۋبليكا اۋماعىنا لوكداۋن ەنگىزۋگە بايلانىستى ەش ماسەلە كورىپ وتىرعان جوقپىز. ول كۇن تارتىبىندە دە جوق. كەشە ۆەدومستۆوارالىق كوميسسيا وتىرىسىندا نۇر-سۇلتان قالاسىندا ناقتى شەكتەۋ شارالارىن قابىلدادىق. ءسوز جوق، ونىڭ ءبارىن الدىن الۋ شارالارى دەپ ايتۋعا تولىق مۇمكىندىك بار. ونىڭ ىشىندە ناقتى وبەكتىلەر مەن قىزمەت كورسەتۋ سالاسىنا، حالىق كوپ جينالاتىن ساۋدا ورتالىقتارىنا بايلانىستى قانداي شارالار قولعا الىنعانىن وزدەرىڭىز ەستىدىڭدىزدەر. سوندىقتان قازىر وسى شارالار اينالاسىندا جۇمىس ىستەي بەرەمىز. ءارى قارايعى شەشىم قابىلداۋىمىز ەلدەگى ەپيدەميولوگيالىق جاعدايعا بايلانىستى بولادى»، - دەپ جاۋاپ بەردى ەرالى توعجانوۆ.
ايتا كەتەيىك، 22 ماۋسىمدا ەلوردادا كوروناۆيرۋستىڭ ءۇندى شتاممى انىقتالدى. كوروناۆيرۋستىڭ «دەلتا» شتاممى جوعارى جۇقتىرعىشقا يە جانە شتامم انىقتالعان ناۋقاستاردىڭ 60 پايىزىندا 7 كۇنگە دەيىنگى بارىنشا قىسقا ينكۋباتسيالىق كەزەڭىمەن ەرەكشەلەنەدى.
