اتىراۋ وبلىسى اكىمى ماحامبەت دوسمۇحامبەتوۆ «BRIMSTONE Sulphur Provider Company» كومپانياسىنىڭ نەگىزىن قالاۋشى ەفە مۋنيپ نۋردوعدۋمەن كەزدەسىپ، حيميا ونەركاسىبى سالاسىنا قاتىستى جوبالاردى تالقىلادى.
وبلىس اكىمى ماحامبەت دوسمۇحامبەتوۆ مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا اتاپ كورسەتكەنىندەي، ەلىمىزدىڭ باتىس وڭىرلەرى مۇناي-حيميا كەشەندەرىن سالىپ، جوعارى دەڭگەيدەگى قايتا وڭدەۋ ءىسىنىڭ جاڭا وندىرىستىك تسيكلدارىن قۇرۋعا ەرەكشە نازار اۋدارۋدا ەكەنىن اتاپ ءوتتى. وسى باعىتتا اتىراۋ وڭىرىندە بىرقاتار اۋقىمدى جوبا قولعا الىنىپ، ينۆەستيتسيا تارتۋ جۇمىستارى جۇرگىزىلىپ جاتقانىنا توقتالدى.
ءوز كەزەگىندە تۇرىك ينۆەستورى اتىراۋ وبلىسىندا كۇكىرت بەتونيتىن وندىرەتىن ونەركاسىپ ورىنىن اشۋعا دايىن ەكەنىن جەتكىزدى. ينۆەستيتسيا كولەمى شامامەن 10 ملن اقش دوللارى بولاتىن جوبا 50-دەي تۇراقتى جۇمىس ورىنىن اشۋعا مۇمكىندىك بەرەدى.
«قازاقستاندا كۇكىرتتىڭ جەتكىلىكتى قورى بار. الايدا، ءبىز ءۇشىن دە، جالپى ەل ءۇشىن دە شيكىزاتتى تەرەڭ وڭدەۋدى ۇيىمداستىرۋ، دايىن ءونىمدى كۇكىرت بەنتونيتى تۇرىندە شىعارۋ جانە ەكسپورتتاۋ الدەقايدا ءتيىمدى. لوگيستيكالىق تۇرعىدان العاندا، اتىراۋ وبلىسى بۇل جوبانى جۇزەگە اسىرۋ ءۇشىن وتە ىڭعايلى ينۆەستيتسيالىق الاڭ. وسى جەردەن قىتاي، ەۋروپا جانە رەسەي سىندى ءىرى نارىقتارعا شىعۋدىڭ الەۋەتى زور»،- دەدى ەفە مۋنيپ نۋردوعدۋ.
