اتىراۋ وبلىسى اكىمىنىڭ ءبىرىنشى ورىنباسارى سەرىك ايداربەكوۆ وزبەكستان رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى سايديكرام نيازحودجاەۆتى قابىلدادى.
كەزدەسۋ بارىسىندا ەكىجاقتى ساۋدا-ەكونوميكالىق ىنتىماقتاستىقتى ودان ءارى كەڭەيتۋ، ينۆەستيتسيا تارتۋ، سونداي-اق بىرلەسكەن كاسىپورىندار قۇرۋ ماسەلەسى تالقىلانىپ، ەكى ەل اراسىنداعى مادەني بايلانىس تۋرالى اڭگىمە قوزعالدى.
«ەلىمىز تاۋەلسىزدىك العاننان بەرى ەكى ەل اراسىندا جاقىن دوستىق قارىم-قاتىناس قالىپتاستى. اتىراۋ وبلىسىنىڭ دا وزبەكستانمەن ىنتىماقتاستىعى قارقىندى دامىپ كەلەدى»،-دەگەن سەرىك ايداربەكوۆ باۋىرلاس ەلدەر اراسىنداعى الىس-بەرىستىڭ ارتىپ كەلە جاتقانىنا توقتالدى.
ونىڭ سوزىنشە، 2021 جىلعى قاڭتار-ناۋرىز ايلارىنىڭ وزىندە اتىراۋ وبلىسىنىڭ وزبەكستانمەن سىرتقى ساۋدا اينالىمى 18,9 ملن. اقش دوللارىن قۇراعان. بۇل 2020 جىلعى وسى كەزەڭمەن سالىستىرعاندا ءۇش ەسەگە، ياعني 6,4 ملن. اقش دوللارىنا ارتقانىن كورسەتەدى.
«ءبىز ەجەلدەن باۋىرلاس ءارى كورشى ەلمىز. ونىڭ ۇستىنە وزبەكستاندا ميلليوننان استام قازاق تۇرادى. مەملەكەتتەرىمىزدىڭ اراسىنداعى دوستىق پەن ىنتىماقتاستىق ەكى جاققا دا الەۋمەتتىك-ەكونوميكالىق جاعىنان پايدالى بولىپ، بايلانىس ارتارىنا سەنەمىن»،-دەدى ەلشى سايديكرام نيازحودجاەۆ. سونداي-اق، وزبەكستان ەلشىسى ەكى مەملەكەت اراسىندا اۋە رەيستەرىنىڭ جانداناتىنىنا دا ايرىقشا توقتالدى.
كەزدەسۋ سوڭىندا سەرىك ايداربەكوۆ وڭىردە جالپى اۋدانى 210 گەكتار يندۋستريالىق ايماققا ينۆەستورلارعا قولايلى جاعداي جاساۋ ءۇشىن بارلىق قاجەتتى ينفراقۇرىلىم جۇرگىزىلەتىنىن جەتكىزدى. «يندۋستريالىق ايماقتىڭ اۋماعىندا الەمدىك ستاندارتتارعا ساي كەلەتىن زاماناۋي ونەركاسىپتىك-وندىرىستىك كەشەندەر قۇرۋ جوسپارلانۋدا. وزبەكستان ينۆەستورلارىن دا وسىنداي مۇمكىندىكتەردى پايدالانۋعا شاقىرامىز»،-دەدى ول.
ايتا كەتەيىك، بۇگىنگى تاڭدا اتىراۋ وبلىسىندا وزبەكستان كاپيتالىنىڭ قاتىسۋىمەن 18 كاسىپورىن جۇمىس جاساۋدا.
