Atyraý oblysynyń Ózbekstanmen saýda aınalymy artyp keledi

1891
Adyrna.kz Telegram

Atyraý oblysy ákiminiń birinshi orynbasary Serik Aıdarbekov Ózbekstan Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Saıdıkram Nııazhodjaevty qabyldady.

Kezdesý barysynda ekijaqty saýda-ekonomıkalyq yntymaqtastyqty odan ári keńeıtý, ınvestıııa tartý, sondaı-aq birlesken kásiporyndar qurý máselesi talqylanyp, eki el arasyndaǵy mádenı baılanys týraly áńgime qozǵaldy.

«Elimiz Táýelsizdik alǵannan beri eki el arasynda jaqyn dostyq qarym-qatynas qalyptasty. Atyraý oblysynyń da Ózbekstanmen yntymaqtastyǵy qarqyndy damyp keledi»,-degen Serik Aıdarbekov baýyrlas elder arasyndaǵy alys-beristiń artyp kele jatqanyna toqtaldy.

Onyń sózinshe, 2021 jylǵy qańtar-naýryz aılarynyń ózinde Atyraý oblysynyń Ózbekstanmen syrtqy saýda aınalymy 18,9 mln. AQSh dollaryn quraǵan. Bul 2020 jylǵy osy kezeńmen salystyrǵanda úsh esege, ıaǵnı 6,4 mln. AQSh dollaryna artqanyn kórsetedi.

«Biz ejelden baýyrlas ári kórshi elmiz. Onyń ústine Ózbekstanda mıllıonnan astam qazaq turady. Memleketterimizdiń arasyndaǵy dostyq pen yntymaqtastyq eki jaqqa da áleýmettik-ekonomıkalyq jaǵynan paıdaly bolyp, baılanys artaryna senemin»,-dedi elshi Saıdıkram Nııazhodjaev. Sondaı-aq, Ózbekstan elshisi eki memleket arasynda áýe reısteriniń jandanatynyna da aıryqsha toqtaldy.

Kezdesý sońynda Serik Aıdarbekov óńirde jalpy aýdany 210 gektar ındýstrııalyq aımaqqa ınvestorlarǵa qolaıly jaǵdaı jasaý úshin barlyq qajetti ınfraqurylym júrgiziletinin jetkizdi. «Indýstrııalyq aımaqtyń aýmaǵynda álemdik standarttarǵa saı keletin zamanaýı ónerkásiptik-óndiristik keshender qurý josparlanýda. Ózbekstan ınvestorlaryn da osyndaı múmkindikterdi paıdalanýǵa shaqyramyz»,-dedi ol.

Aıta keteıik, búgingi tańda Atyraý oblysynda Ózbekstan kapıtalynyń qatysýymen 18 kásiporyn jumys jasaýda.

Pikirler