قازاقستاندا كوللەدجدەرگە قۇجات قابىلداۋ 2021 جىلدىڭ 25 ماۋسىمىندا باستالادى. قابىلداۋ ءراسىمى جاڭا ەرەجەلەر بويىنشا جۇرگىزىلەدى. سونىمەن قاتار تەگىن ءبىلىم العىسى كەلەتىندەر ءۇشىن كۆوتالار ءتىزىمى كەڭەيتىلدى. بۇل جاڭاشىلدىقتار تۋرالى ۆەدومستۆونىڭ Facebook-تەگى رەسمي پاراقشاسىندا قر بعم تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا ايتىپ بەردى.
بيىل پەداگوگيكالىق، مەديتسينالىق جانە شىعارماشىلىق ماماندىقتاردى قوسپاعاندا، قابىلداۋ ەمتيحاندارى بولمايدى. كونكۋرس اتتەستاتتاعى مىندەتتى جانە بەيىندىك پاندەردىڭ ورتاشا بالى بويىنشا وتكىزىلەدى.
بۇدان باسقا ءبىلىم بەرۋدىڭ اشىقتىعى مەن قولجەتىمدىلىگىن قامتاماسىز ەتۋ ءۇشىن قر بعم «اقشا ستۋدەنتپەن بىرگە جۇرەدى» قاعيداتى نەگىزىندە گرانتتاردى ءبولۋدىڭ جاڭا تەتىگىن ازىرلەدى. ياعني، ەگەر بۇرىن گرانتتار كوللەدجدەر اراسىندا بولىنگەن بولسا، ەندى ولار تالاپكەرلەردىڭ تاڭداۋى بويىنشا بەرىلەدى. مەملەكەتتىك تاپسىرىس تالاپكەرلەردىڭ تاڭداۋى بويىنشا كوللەدجدەر اراسىندا ورنالاستىرىلاتىن بولادى.
تجكب ۇيىمدارىنا قابىلداۋ 25 ماۋسىمنان باستالادى. تالاپكەرلەر كوللەدجگە قۇجاتتاردى ەكى تاسىلمەن ەلەكتروندىق ۇكىمەت پورتالى Egov.kz ارقىلى نەمەسە تىكەلەي كوللەدجگە تاپسىرا الادى.
بولاشاق ستۋدەنتتەردىڭ 4 ماماندىق پەن 4 كوللەدجگە دەيىن تاڭداۋ قۇقىعى بار. كونكۋرس اتتەستاتتاعى مىندەتتى جانە بەيىندىك پاندەردەن قويىلعان باعانىڭ ورتاشا كونكۋرستىق بالى بويىنشا اقپاراتتىق جۇيە ارقىلى وتكىزىلەدى. پەداگوگيكالىق، مەديتسينالىق جانە شىعارماشىلىق ماماندىقتاردا وقىعىسى كەلەتىن تۇلەكتەر ارنايى نەمەسە شىعارماشىلىق ەمتيحاندار تاپسىرىپ، اڭگىمەلەسۋدەن وتەدى. ارنايى نەمەسە شىعارماشىلىق ەمتيحانداردى كوللەدجدەر جانىنان قۇرىلعان كوميسسيالار جۇرگىزەتىن بولادى.
«كونكۋرس 2 كەزەڭگە بولىنگەن. ءبىرىنشى 9-سىنىپ نەگىزىندە وقۋعا تۇسەتىن تالاپكەرلەر اراسىندا مەملەكەتتىك تاپسىرىستى ءبولۋ 19-22 تامىز ارالىعىندا، ال، 11 سىنىپ تۇلەكتەرى ءۇشىن 22-25 تامىز ارالىعىندا وتەدى. يگەرىلمەگەن ورىندار بولعان جاعدايدا ءبىلىم گرانتىمەن قامتىلماعان تالاپكەرلەر اراسىندا مەملەكەتتىك ءبىلىم بەرۋ تاپسىرىسىن قايتا ءبولۋ جۇرگىزىلەدى. مەملەكەتتىك تاپسىرىس بويىنشا وقۋعا قابىلداۋ تۋرالى اقپارات تالاپكەردىڭ جەكە كابينەتىنە كەلەدى. كوللەدجدەرگە قابىلداۋ 31 تامىزدا اياقتالادى»، – دەپ اتاپ ءوتتى قر بعم تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا.
بۇگىنگى تاڭدا ەلىمىزدە 795 كوللەدج جۇمىس ىستەيدى. ونىڭ 454-ءى مەملەكەتتىك وقۋ ورىندارى. گرانتتاردى 435 مەملەكەتتىك كوللەدج جانە 170 جەكە مەنشىك كوللەدج الادى. 2021-2022 وقۋ جىلىنا مەملەكەتتىك ءبىلىم بەرۋ تاپسىرىسى 10 باعىت جانە 200-دەن استام سۇرانىسقا يە ماماندىقتار بويىنشا 97 مىڭ ورىنعا قالىپتاستىرىلعان.
«بيىل كۆوتالىق ساناتتار ءتىزىمى كەڭەيتىلدى، ەندى كۆوتالار 9 سانات بويىنشا قاراستىرىلادى. كوپ بالالى وتباسىلاردان شىققان بالالار ءۇشىن 5%، مارتەبەسى كەمىندە ءۇش جىل تولىق ەمەس وتباسىلار قاتارىنداعى بالالارعا 1%، بالا كەزىنەن مۇگەدەك بالالاردى تاربيەلەپ وتىرعان وتباسىلاردان شىققان تالاپكەرلەر مەن ءبىرىنشى جانە ەكىنشى توپتاعى مۇگەدەكتەر ءۇشىن 1% كۆوتا قوسىلدى. بالدار تەڭ بولعان جاعدايدا كۆوتالىق سانات جانە اتتەستاتتىڭ ورتاشا بالى ەسكەرىلەدى»، – دەپ اتاپ ءوتتى ناسىمجان وسپانوۆا.
سونىمەن قاتار بيىل العاش رەت بارلىق تۇلەكتەرگە ءبىلىم باسقارمالارىنىڭ اقپاراتتىق جۇيەلەرى ارقىلى كاسىبي دياگنوستيكادان ءوتۋ مۇمكىندىگى بەرىلەدى. دياگنوستيكا تۇلەكتەرگە ماماندىق تاڭداۋدا كومەكتەسۋگە ارنالعان جانە ۇسىنىمدىق سيپاتقا يە.
«ادىرنا» ۇلتتىق پورتالى
