Qazaqstanda kolledjderge qujat qabyldaý 2021 jyldyń 25 maýsymynda bastalady. Qabyldaý rásimi jańa erejeler boıynsha júrgiziledi. Sonymen qatar tegin bilim alǵysy keletinder úshin kvotalar tizimi keńeıtildi. Bul jańashyldyqtar týraly vedomstvonyń Facebook-tegi resmı paraqshasynda QR BǴM Tehnıkalyq jáne kásiptik bilim departamentiniń dırektory Nasymjan Ospanova aıtyp berdi.
Bıyl pedagogıkalyq, medıınalyq jáne shyǵarmashylyq mamandyqtardy qospaǵanda, qabyldaý emtıhandary bolmaıdy. Konkýrs attestattaǵy mindetti jáne beıindik pánderdiń ortasha baly boıynsha ótkiziledi.
Budan basqa bilim berýdiń ashyqtyǵy men qoljetimdiligin qamtamasyz etý úshin QR BǴM «aqsha stýdentpen birge júredi» qaǵıdaty negizinde granttardy bólýdiń jańa tetigin ázirledi. Iaǵnı, eger buryn granttar kolledjder arasynda bólingen bolsa, endi olar talapkerlerdiń tańdaýy boıynsha beriledi. Memlekettik tapsyrys talapkerlerdiń tańdaýy boıynsha kolledjder arasynda ornalastyrylatyn bolady.
TjKB uıymdaryna qabyldaý 25 maýsymnan bastalady. Talapkerler kolledjge qujattardy eki tásilmen elektrondyq úkimet portaly Egov.kz arqyly nemese tikeleı kolledjge tapsyra alady.
Bolashaq stýdentterdiń 4 mamandyq pen 4 kolledjge deıin tańdaý quqyǵy bar. Konkýrs attestattaǵy mindetti jáne beıindik pánderden qoıylǵan baǵanyń ortasha konkýrstyq baly boıynsha aqparattyq júıe arqyly ótkiziledi. Pedagogıkalyq, medıınalyq jáne shyǵarmashylyq mamandyqtarda oqyǵysy keletin túlekter arnaıy nemese shyǵarmashylyq emtıhandar tapsyryp, áńgimelesýden ótedi. Arnaıy nemese shyǵarmashylyq emtıhandardy kolledjder janynan qurylǵan komıssııalar júrgizetin bolady.
«Konkýrs 2 kezeńge bólingen. Birinshi 9-synyp negizinde oqýǵa túsetin talapkerler arasynda memlekettik tapsyrysty bólý 19-22 tamyz aralyǵynda, al, 11 synyp túlekteri úshin 22-25 tamyz aralyǵynda ótedi. Igerilmegen oryndar bolǵan jaǵdaıda bilim grantymen qamtylmaǵan talapkerler arasynda memlekettik bilim berý tapsyrysyn qaıta bólý júrgiziledi. Memlekettik tapsyrys boıynsha oqýǵa qabyldaý týraly aqparat talapkerdiń jeke kabınetine keledi. Kolledjderge qabyldaý 31 tamyzda aıaqtalady», – dep atap ótti QR BǴM Tehnıkalyq jáne kásiptik bilim departamentiniń dırektory Nasymjan Ospanova.
Búgingi tańda elimizde 795 kolledj jumys isteıdi. Onyń 454-i memlekettik oqý oryndary. Granttardy 435 memlekettik kolledj jáne 170 jeke menshik kolledj alady. 2021-2022 oqý jylyna memlekettik bilim berý tapsyrysy 10 baǵyt jáne 200-den astam suranysqa ıe mamandyqtar boıynsha 97 myń orynǵa qalyptastyrylǵan.
«Bıyl kvotalyq sanattar tizimi keńeıtildi, endi kvotalar 9 sanat boıynsha qarastyrylady. Kóp balaly otbasylardan shyqqan balalar úshin 5%, mártebesi keminde úsh jyl tolyq emes otbasylar qataryndaǵy balalarǵa 1%, bala kezinen múgedek balalardy tárbıelep otyrǵan otbasylardan shyqqan talapkerler men birinshi jáne ekinshi toptaǵy múgedekter úshin 1% kvota qosyldy. Baldar teń bolǵan jaǵdaıda kvotalyq sanat jáne attestattyń ortasha baly eskeriledi», – dep atap ótti Nasymjan Ospanova.
Sonymen qatar bıyl alǵash ret barlyq túlekterge bilim basqarmalarynyń aqparattyq júıeleri arqyly kásibı dıagnostıkadan ótý múmkindigi beriledi. Dıagnostıka túlekterge mamandyq tańdaýda kómektesýge arnalǵan jáne usynymdyq sıpatqa ıe.
«Adyrna» ulttyq portaly
