ساتپاەۆ قالاسىندا "بەس جاسار قىزدى زورلادى" دەپ ايىپتالعان كۇدىكتىلەرگە قاتىستى سوت ۇكىمى شىقتى، دەپ حابارلايدى «ادىرنا» ءتىلشىسى ەۋرازيا ءبىرىنشى ارناسىنا سىلتەمە جاساپ.
كامەلەتكە تولماعان بالاعا جىنىستىق سيپاتتاعى ءىس-ارەكەت جاساعان پەدوفيل ءومىر بويىنا باس بوستاندىعىنان ايىرىلدى. ال ونىڭ ايەلى 22 جىلعا كەسىلدى. قوعامنىڭ نارازىلىعىن تۋدىرعان ءىس جابىق جاعدايدا ءوتتى. تەرگەۋ بارىسىندا انىقتالعانداي، 62 جاستاعى كۇدىكتى الكوگولدىك ىشىمدىك ءىشىپ، پودەزدە ويناپ جۇرگەن قىزدى كۇشپەن ۇيىنە الىپ كىرگەن. سودان كەيىن، كورشىسىن شاقىرىپ بالاعا زورلىق-زومبىلىق جاساۋعا ۇگىتتەپتى. ال، ازعىننىڭ ايەلى ەكى ازاماتتىڭ ارام پيعىلىن بىلە تۇرا قىزعا ۋكول سالىپ، ەسىنەن تاندىرعانى بەلگىلى بولدى. وقيعا بويىنشا ايىپتالعان تاعى ءبىر كۇدىكتى تەرگەۋ بارىسىندا سۋيتسيدكە بارعاندىقتان، وعان قاتىستى ءىس توقتاتىلعان. وسى ارەكەتتەرى ءۇشىن سوتتالۋشىلارعا ەڭ اۋىر جازا تاعايىندالدى. بىراق، قىلمىسكەرگە حيميالىق كاستراتسيا جاسالمايتىن بولدى. سەبەبى، جۇرگىزىلگەن ساراپتاما قورىتىندىسى ونى قاجەت دەپ تاپپاعان.
«قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارلىق سوتىمەن، القا بيلەردىڭ قاتىسۋىمەن ساتپاەۆ قالاسىندا 5 جاسار قىزعا سەكسۋالدىق سيپاتتاعى زورلىق-زومبىلىق جانە زورلاۋ سونىمەن قاتار ونىڭ دەنساۋلىعىنا اۋىر زيان كەلتىرۋ دەرەگى بويىنشا قىلمىستىق ءىس قارالىپ، ول بويىنشا ۇكىم شىعارىلدى. قازىرگى تاڭدا ۇكىم زاڭدى كۇشىنە ەنگەن جوق»،– دەدى وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ توراعاسى بەكزات شالعىمباەۆ.
ەسكە سالا كەتەيىك، سۇمدىق وقيعا وتكەن جىلى 23 شىلدەدە تىركەلگەن ەدى. اتالعان قىلمىستان سوڭ، اشۋعا ەرىك بەرگەن تۇرعىندار جاپپاي تارتىپسىزدىككە بارىپ، ازعىندى وزدەرى جازالاماق بولعان.
«ادىرنا» ۇلتتىق پورتالى
