اكىمنىڭ ءزاۋلىم ءۇيى حالىقتىڭ اشۋىنا ءتيدى

2177
Adyrna.kz Telegram

جامبىل وبلىسىندا تۇرعىندار باسپانا الۋعا جىلداپ كەزەكتە تۇرسا، كەي اكىمدەر بىردەن بىرنەشە پاتەردى يەمدەنىپ العان. سارىسۋ اۋدانىنىڭ باسشىسى بەس قاباتتى ءۇيدىڭ ءبىرىنشى قاباتىنداعى بارلىق پاتەرلەردى قىزمەتتىك باسپانا رەتىندە پايدالانىپ وتىر ەكەن. وعان قوسا عيماراتقا جاپسارلاس سوعىلعان كولىگىن قوياتىن گاراج دا سالىپ العان. تۇرعىندار «قاراپايىم حالىققا ءبىر پاتەر ارمان بولعاندا، اكىمنىڭ حان سارايىنداي باسپانادا تۇرۋى ۇيات تىرلىك» دەيدى. ال اۋدان باسشىسى ەلدىڭ بۇل پىكىرىمەن كەلىسپەيدى. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.

1 ەتاجىنان 4 كۆارتيرا بار، 4 كۆارتيرا وزىنىكى. ەششە ەلدەن بولەك گاراج سوعىپ العان، جاڭاتاستا وسىنداي بىرەۋ-اق. ول كىمنىڭ ءۇيى؟ اۋدان اكىمىنىڭ ءۇيى. ەلدەر كۆارتيراعا جەتە الماي ءجۇر، ءبىزدىڭ اكىمنىڭ 4 كۆارتيراسى بار.

تۇرعىنداردىڭ شامىنا ءتيىپ وتىرعان وسى ءۇي. ايتۋلارىنشا، اكىم ءبىرىنشى قاباتتاعى 4 پاتەردى بىرىكتىرىپ العان. شىعاتىن ەسىگى دە بولەك. ءۇي ارتىنان سوعىلعان قوسىمشا قۇرىلىس ىشىنە قىزمەتتىك كولىگىن قويىپ، سول جەردەن ۇيىنە كىرەدى ەكەن.

كىمدى كورەسىزدەر؟ اكىمدى كورەمىز. نە ىستەيدى اكىم؟ ءۇيى عوي ەندى. تۇراتىن ءۇيى مە؟ ءيا، رەزيدەنتسيا ما؟

قىزمەتتىك پاتەردىڭ جالپى اۋماعى 130 شارشى مەتردى قۇرايدى ەكەن. اكىم بۇل باسپانانى اۋداننىڭ بۇرىنعى باسشىلارى وسىلاي ەتىپ جاساعانىن ايتادى. مارات سۇلتانعاليەۆ بۇل قىزمەتكە وسىدان ەكى اي بۇرىن تاعايىندالعان. ونىڭ باسقا تۇراتىن پاتەرى جوق، ال قازىرگىسىن مەملەكەتكە وتكىزىپ، جاڭاسىن تۇرعىزۋعا قاراجات قيماي وتىرمىز دەپ اقتالدى.

«4 بولمە قالعانى اسحانا، دالىزدەر عوي. ماعان دەيىنگى شەشىلگەن باسشىلاردىڭ جوباسى. بىراق  مەن مۇنى دۇرىس شەشىلگەن جوبا دەپ ويلايمىن. ويتكەنى ءوزىڭىز بىلەسىز جەر ءبولىپ، كوممۋنيكاتسياسى بار، كارىز جۇيەسى بار، جىلۋى بار كۇتىپ ۇستاۋ ۇكىمەتكە، مەملەكەتكە ءتيىمسىز»، - دەيدى سارىسۋ اۋدانىنىڭ اكىمى مارات سۇلتانعاليەۆ.

وسىلايشا، اكىم بۇل قىزمەتتىك پاتەردى ارى قاراي دا پايدانالا بەرمەكشى. ال حالىقتىڭ باسپاناعا مۇقتاجدىعىن كەزەڭ-كەزەڭىمەن شەشەتىنىن ايتادى. قازىرگى تاڭدا سارىسۋ اۋدانى بويىنشا ءۇي الۋعا بارلىعى 1 724 ادام كەزەك كۇتىپ وتىر.

"ادىرنا" ۇلتتىق پورتالى

پىكىرلەر