«سىرتقى ەكونوميكالىق زەرتتەۋلەر ينستيتۋتى» اق باسقارما توراعاسىنىڭ ورىنباسارى ماناربەك قابازيەۆ «قازاقستان رەسپۋبليكاسىنىڭ 2021-2025 جىلدارعا ارنالعان ۇلتتىق قاۋىپسىزدىك ستراتەگياسىن بەكىتۋ تۋرالى» پرەزيدەنت جارلىعىنا قاتىستى پىكىرىن ءبىلدىردى.
ماناربەك قابازيەۆتىڭ ايتۋىنشا، جاڭا ستراتەگيادا الەمدە جانە ەلىمىزدە بولىپ جاتقان وزەكتى وزگەرىستەر قامتىلعان.
قازاقستاننىڭ 2021-2025 جىلدارعا ارنالعان ۇلتتىق قاۋىپسىزدىك ستراتەگياسىندا اقپان ايىندا ەلباسى قاۋىپسىزدىك كەڭەسىندە اتاپ كورسەتكەن ۇلتتىق مۇددەنى قورعاۋدىڭ جاڭا كونتسەپتسۋالدىق قادامدارى بەكىتىلدى. ستراتەگيا الداعى بەس جىلداعى قاتەرلەردى ەڭسەرۋگە نەگىزدەلگەن. كوپتەگەن ەل ىشكى جانە سىرتقى جاعدايلاردى باسشىلىققا الىپ، وزدەرىنىڭ قاۋىپسىزدىك تۋرالى ستراتەگيالارىن جاڭارتۋدا، - دەپ اتاپ ءوتتى ول.
ساراپشىنىڭ ايتۋىنشا، ستراتەگيا وتكەن جىلى باستالعان كوروناۆيرۋستىق پاندەميانىڭ جالعاسۋىن، بيولوگيالىق قاۋىپسىزدىك ماسەلەلەرىن باسشىلىققا الدى. سونىمەن قاتار قۇجاتتا الەمدىك نارىقتاعى كريزيستىك جاعدايلار مەن ونىڭ ەل ەكونوميكاسىنا اسەرى ەسكەرىلدى.
جالپى قۇجاتتىڭ ەڭ نەگىزگى اسپەكتىسى - ازاماتتاردىڭ، قوعام مەن مەملەكەتتىڭ قاۋىپسىزدىگى. جاڭا ستراتەگيانى قابىلداۋ ادامي كاپيتالدى قامتاماسىز ەتۋگە باعىتتالعان ۋاقىتىلى جانە ماڭىزدى قادام بولدى. مۇندا ەكولوگيالىق قاۋىپسىزدىك ماسەلەسىنە دە نازار اۋدارىلعان، - دەدى ول.
ساراپشىنىڭ سوزىنشە، مۇنداي دەڭگەيدەگى قۇجاتتا ەلدىڭ قورعانىس قاۋىپسىزدىگىنە ۇنەمى ەرەكشە نازار اۋدارىلاتىن. جاڭا قۇجاتتا دا جاڭا ايماقتىق، جاھاندىق قاتەرلەر ەسكەرىلگەن.
ەستەرىڭىزگە سالا كەتەيىك، كەشە مەملەكەت باسشىسى قاسىم-جومارت توقاەۆ «قازاقستان رەسپۋبليكاسىنىڭ 2021-2025 جىلدارعا ارنالعان ۇلتتىق قاۋىپسىزدىك ستراتەگياسىن بەكىتۋ تۋرالى» جارلىققا قول قويدى.
اقپارات BAQ.KZ سايتىنان الىندى
فوتو: دەرەككوز
