«Syrtqy ekonomıkalyq zertteýler ınstıtýty» AQ basqarma tóraǵasynyń orynbasary Manarbek Qabazıev «Qazaqstan Respýblıkasynyń 2021-2025 jyldarǵa arnalǵan Ulttyq qaýipsizdik strategııasyn bekitý týraly» Prezıdent jarlyǵyna qatysty pikirin bildirdi.
Manarbek Qabazıevtiń aıtýynsha, jańa strategııada álemde jáne elimizde bolyp jatqan ózekti ózgerister qamtylǵan.
Qazaqstannyń 2021-2025 jyldarǵa arnalǵan Ulttyq qaýipsizdik strategııasynda aqpan aıynda Elbasy Qaýipsizdik keńesinde atap kórsetken ulttyq múddeni qorǵaýdyń jańa konepýaldyq qadamdary bekitildi. Strategııa aldaǵy bes jyldaǵy qaterlerdi eńserýge negizdelgen. Kóptegen el ishki jáne syrtqy jaǵdaılardy basshylyqqa alyp, ózderiniń qaýipsizdik týraly strategııalaryn jańartýda, - dep atap ótti ol.
Sarapshynyń aıtýynsha, strategııa ótken jyly bastalǵan koronavırýstyq pandemııanyń jalǵasýyn, bıologııalyq qaýipsizdik máselelerin basshylyqqa aldy. Sonymen qatar qujatta álemdik naryqtaǵy krızıstik jaǵdaılar men onyń el ekonomıkasyna áseri eskerildi.
Jalpy qujattyń eń negizgi aspektisi - azamattardyń, qoǵam men memlekettiń qaýipsizdigi. Jańa strategııany qabyldaý adamı kapıtaldy qamtamasyz etýge baǵyttalǵan ýaqytyly jáne mańyzdy qadam boldy. Munda ekologııalyq qaýipsizdik máselesine de nazar aýdarylǵan, - dedi ol.
Sarapshynyń sózinshe, mundaı deńgeıdegi qujatta eldiń qorǵanys qaýipsizdigine únemi erekshe nazar aýdarylatyn. Jańa qujatta da jańa aımaqtyq, jahandyq qaterler eskerilgen.
Esterińizge sala keteıik, keshe Memleket basshysy Qasym-Jomart Toqaev «Qazaqstan Respýblıkasynyń 2021-2025 jyldarǵa arnalǵan Ulttyq qaýipsizdik strategııasyn bekitý týraly» Jarlyqqa qol qoıdy.
Aqparat BAQ.KZ saıtynan alyndy
Foto: derekkóz
