قر تۇڭعىش پرەزيدەنتى – ەلباسى نۇرسۇلتان نازارباەۆ «Nur Otan» پارتياسىنىڭ 2025 جىلعا دەيىنگى «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىندا دارىگەرلەر مەن مۇعالىمدەردىڭ جالاقىسى، ستۋدەنتتەردىڭ شاكىرتاقىسى تاعى وسەتىنى تۋرالى ايتقان ەدى. مىنە، كۇزدەن باستاپ ستۋدەنتتەر مەن ماگيسترانتتاردىڭ، دوكتورانتتاردىڭ شاكىرتاقىسى كوبەيەتىن بولدى.
ەلباسى نەگىزىن قالاعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ءبىر توپ ءبىلىم الۋشىلارىنىڭ پىكىرىن جاريالاعاندى ءجون كوردىك.
اسىل-داستان بازاربەك، فيزيكا-تەحنيكالىق فاكۋلتەتىنىڭ 3 كۋرس دوكتورانتى:
-مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ فيزيكا-تەحنيكالىق فاكۋلتەتىندە دوكتورانتۋرادا وقيمىن. اماندىق بولسا، بيىل بىتىرەمىن. مەملەكەتتىك ەمتيحاندى ۇزدىك تاپسىرىپ، قازىر ديسسەرتاتسيا قورعاۋعا دايىندالىپ جاتىرمىن.
ايتايىن دەگەنىم، كۇزدەن باستاپ ستۋدەنتتەر مەن ماگيسترانتتاردىڭ، دوكتورانتتاردىڭ شاكىرتاقىسى كوبەيەتىنىن ەستىپ، بۇكىل ءبىلىم الۋشىلاردىڭ قۋانىشىمەن ورتاقتاسقىم كەلدى. ويتكەنى ءوزىم وقىعان دوكتورناتۋرادا سوڭعى ەكى جىلدا ستيپەنيا مولشەرى 82 پايىزعا ءوستى، ال قىركۇيەك ايىندا ونىڭ مولشەرى 150- مىڭ تەڭگەدەن 172 مىڭ تەڭگەگە كوبەيمەك. بۇل عىلىم جولىنا تۇسكەن جاستار ءۇشىن ۇلكەن قامقورلىق، سونىمەن قاتار ءبىلىم جانە عىلىم ءمينيسترى اسحات ايماعامبەتوۆتىڭ وسى سالانى جەتىك بىلەتىن، ناعىز جاناشىر، بىلىكتى باسشى ەكەنىن كورسەتەدى. مەن مۇنىڭ ءبارىن ءبىلىم جانە عىلىم مينيسترلىگى كەلەسى وقۋ جىلىندا تالاپكەرلەرگە قانشا گرانت ءبولۋ جاسپارلاعانىنان-اق اڭعارىپ وتىرمىن. ماسەلەن، جىل سايىن مينيسترلىك باكالاۆرياتقا 51 مىڭ گرانت بولەتىن بولسا، بيىل 56 مىڭ ورىنعا كوتەرىلىپ وتىر.
مىنە، وسىلاردىڭ اراسىنان ەرتەڭ ەلىمىزدىڭ ءبىلىمى مەن عىلىمىن دامىتۋعا ۇلەس قوساتىن ماگيسترانتتار مەن دوكتورانتتار شىقپايدى دەيسىز بە؟ شىققاندا قانداي! دەمەك، عىلىمنىڭ بولاشاعى – بۇگىنگى جاستار، ياعني ەندىگى عىلىم مەنىڭ زامانداستارىمنىڭ قولىندا دەپ نىق سەنىممەن ايتا الامىن. تەك، العا، دوستار!
نۇرگۇل اۋەزوۆا، مەحانيكا-ماتەماتيكا فاكۋلتەتىنىڭ ماگيسترانتى:
-مۇنداي اقجولتاي اقپاراتتى ەستىگەندە، ارينە، كوڭىلىمىز كوتەرىلىپ، بالاشا قۋانىپ قالدىق. بۇل شەشىم ءبىلىم الىپ جۇرگەندەر ءۇشىن موتيۆاتسيا. بۇرىنعى الىپ جۇرگەن اقشا شىنىمەن دە نۇر-سۇلتان قالاسىندا وقيتىن ستۋدەنتتەرگە از بولاتىن. ويتكەنى ازىق-تۇلىك، پاتەر جالداۋ قۇنى كۇن وتكەن سايىن كوتەرىلۋدە. سونىمەن قاتار ءبىزدىڭ باسقا دا شىعىندارىمىز وتە كوپ. شاكىرتاقىنىڭ كوبەيگەنى ءبىز ءۇشىن جاعىمدى جاڭالىقتاردىڭ ءبىرى بولىپ وتىر.
گۇلنيسا مەركەباي، ساۋلەت-قۇرىلىس فاكۋلتەتىنىڭ 4 كۋرس ستۋدەنتى:
-مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ساۋلەت-قۇرىلىس فاكۋلتەتى، «ساۋلەت» ماماندىعىنىڭ باكالاۆر ستۋدەنتىمىن. 4 كۋرستى ءبىتىرىپ، ەندى بۇيىرسا 5 كۋرسقا كوشەمىن.
ەلباسى نۇرسۇلتان ءابىشۇلى نازارباەۆ ءبىلىم مەن عىلىم سالاسىنا قاشاندا جان-جاقتى قولداۋ كورسەتىپ كەلەدى. «Nur وtan» پارتياسىنىڭ سايلاۋالدى باعدارلاماسىندا شاكىرتاقىنىڭ ءوسۋى تۋرالى ايتقان جاڭالىعىن ەستىگەندە گرۋپپالاستارىمىزبەن بىرگە قۋانعان ەدىك. مىنە، كۇزدەن باستاپ كوبەيگەن شاكىرتاقى قولىمىزعا تيگەلى وتىر. جالپى، ءبىلىم گرانتتارىنىڭ سانىنىڭ كوبەيۋى، شاكىرتاقىنىڭ ءوسۋى ستۋدەنتتەردى، وقۋشىلاردى ىنتالاندىرادى دەپ ويلايمىن. سەبەبى، شاكىرتاقىنىڭ ءوسۋى ستۋدەنتتەردىڭ جاقسى وقۋعا دەگەن تالپىنىستارىن ارتتىرادى.
«ەل بولاشاعى – جاستار» دەسەك، جاستاردىڭ ساپالى ءبىلىم الۋى ماڭىزدى. ال شاكىرتاقىنىڭ كوبەيۋى ۇكىمەتىمىزدىڭ ستۋدەنتتەردى ويلاپ، قامقورلىق جاساۋى جانە وسى ورايدا قر پرەزيدەنتى قاسىم-جومارت توقاەۆقا، ءبىلىم جانە عىلىم ءمينيسترى اسحات ايماعامبەتوۆكە ايتار العىسىمىز شەكسىز!
رامازان ەسماعامبەتوۆ، جۋرناليستيكا جانە ساياساتتانۋ فاكۋلتەتىنىڭ 4 كۋرس ستۋدەنتى:
-نەگىزى ۇكىمەتتىڭ شاكىرتاقىنى 26 186-دان 31 000 تەڭگەدەن جوعارى كوتەرگەنى جاقسى بولدى. بۇرىنعى شاكىرتاقىم ەشتەڭەگە جەتە بەرمەيتىن، ەندى ءوز جوسپارلارىما دا اقشا بار. بۇل بىلگەن ادامعا ۇلكەن بونۋس دەپ ويلايمىن.
ال ەندى مەنى نە الاڭداتادى؟ شىنىمدى ايتسام، اقىلى نەگىزدە وقيتىن ستۋدەنتتەردىڭ جاعدايى الاڭداتادى. ءبىزدىڭ توپتا ونداي بالالار جوق، بىراق ۋنيۆەرسيتەتتە وزگە ماماندىقتا وقىپ جۇرگەن تالاي تانىستارىم مەن دوستارىم بار. سولارعا جانىم اشيدى، ناعىز ءوز ماماندىعىنىڭ مايتالماندارى دەسەم قاتەلەسپەيمىن. ويتكەنى، جوو-دا ناشار وقيتىن بالالاردىڭ گرانتتارى قايتادان ويناتىلىمعا تۇسەدى دەگەن تالاپ بار بولعانىمەن، مەن ونىڭ ىسكە اسقانىن، گرانتتىڭ قايتا ويناتىلعانىن ءوز باسىم كورمەپپىن. سوندىقتان ۋنيۆەرسيتەت مۇلدە وقىمايتىن ستۋدەنتتەردەن گرانتتارىن الىپ، قايتا اينالىمعا سالىپ، بايقاۋ جاريالاپ، تالپىنىسى بار ستۋدەنتتەرگە بەرىپ وتىرسا دۇرىس بولار ما ەدى دەپ ويلاپ قويامىن كەيدە.
