ءبىر مەكتەپتىڭ ەكى ديرەكتورى بار

3260
Adyrna.kz Telegram

شىمكەنتتە ءبىر مەكتەپتىڭ قوس ديرەكتورى بار. قالاداعى №125 وقۋ ورنىنىڭ اتا-انالارى جانە مۇعالىمدەرى بۇل جاعدايدى مۇلدەم تۇسىنە المايدى. سەبەبى وقۋشىلاردىڭ اتتەستاتىندا ءبىرىنشى ديرەكتوردىڭ قولى تۇرسا، ال تابەلدە ەكىنشى باسشىنىڭ اتى-ءجونى جازىلعان. مۇنىمەن وقۋ ورداسىنداعى بىلىق بىتەر ەمەس، قيت ەتسە اقشا جيناۋدى ادەتكە اينالدىرىپ العان ديرەكتور بارلىعىن مەزى قىلىپ بىتىرگەن، دەپ حابارالايدى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ.

قالاداعى ءبىلىم باسقارماسىنىڭ الدىنا جينالعان №125 مەكتەپتىڭ اتا-انالارى مەن مۇعالىمدەرى وقۋ ورداسىندا بولىپ جاتقان جاعدايدى شەشىپ بەرۋدى تالاپ ەتۋدە. ونداعى ماسەلەلەرى - ءبىر مەكتەپتە ەكى ديرەكتوردىڭ جايعاسىپ العاندىعىندا. 2017 جىلدان بەرى مەكتەپ باسشىسى بولىپ كەلە جاتقان اسەت ساتىبالديەۆتىڭ ۇستىنەن ءىس قارالىپ، اعىمداعى جىل ءوز ەركىمەن جۇمىستان كەتكەن ەكەن. ال ونىڭ ورىنىنا كەلگەن ديرەكتور بار-جوعى جارتى جىل جۇمىس ىستەگەن. وتكەن اپتا وعان ءبىلىم باسقارماسىنان ەسكەرتۋسىز كەلىپ، قايتادان اسەت ساتىبالديەۆتىڭ ديرەكتور بولاتىنى ايتىلعان. بىراق تەك اۋىزشا تۇردە.

«مەن ول تۋرالى مۇلدەم بەيحابار بولدىم. قالالىق ءبىلىم باسقاراماسىنان حابارلادى وسىنداي-وسىنداي جۇمىس ورنىنداسىز با دەدى. يا دەدىم. نە ماسەلە دەگەن ەدىم. وسىنداي ديرەكتوردى ساتىباليەۆتى اپارىپ تاعايىندايمىز دەدى. ءبىر ساعات كولەمىندە كەلدى تاعايىنداپ كەتتى. ەشقانداي قۇجاتقا قول قويعان جوقپىن. بىراق بۇگىنگى تاڭدا 10-دا قالالىق ءبىلىم ءبولىمىنىڭ باسقارماسىنان كادر ءبولىمى حابارلاستى. كەلىپ بۇيرىققا قول قويىپ كەتىڭىز دەدى. مەن قازىر ستوتسيوناردامىن دەدىم. ودان شىقپايىنشا ەشقايدا قول قويمايمىن»، - دەيدى №125 مەكتەپتىڭ ديرەكتورى اراپباي ۋريسوۆ.

ال مەكتەپ مۇعالىمدەرى مەن اتا-انالار اسەت ساتىباديەۆتىڭ قايتادان ديرەكتور بولىپ كەلۋىنە ءۇزىلدى-كەسىلدى قارسى. سەبەبى ول ءبىلىم بەرۋ مەكەمەسىنىڭ باسشىسى بولعان كەزدە اقشا جيناۋدى ادەتكە اينالدىرىپ الدى دەيدى مۇعالىمدەر. قيت ەتسە قالتاسىن قامپايتىپ العىسى كەلىپ تۇراتىن ديرەكتور ويىنا كەلگەندى ىستەپ، مەكتەپتى ويراڭداتىپ ءبىتتى دەپ اشىنىپ وتىر. ال مەكتەپتى تاماماداعان وقۋشىلاردىڭ اتا-انالارى اتتەستات پەن تابەلدە ەكى ديرەكتوردىڭ قولى تۇرعانىنا نارازى.

«قىزىمنىڭ سوڭعى ەمتيحانىنان كەيىن تابەل دايىن بولعان. بىراق ەندى دۇيسەنبى بىزدە شاقىرعانان كەيىن اتتەستاتتا باسقا فاميليا تۇر. كىمنىڭ فاميلياسى تۇر؟ ساتىبالديەۆتىڭ فاميلياسى تۇر. تابەلدە ۋرۋسوۆتىڭ فاميلياسى تۇر. ەندى مەنىڭ قىزىمنىڭ بولاشاقتا وقۋ ورنىنا ءتۇسۋ ءۇشىن بۇل اسەر ەتە ما ەتپەي مە؟ اتا-انالار تاراپىنان سونداي تۇسىنىسپەۋشىلىك بولىپ تۇر»، - دەيدى قالا تۇرعىنى كامشات جاقىپباەۆا.

ال جاقىندا قايتا ديرەكتور بولعان اسەت ساتىباديەۆ وقۋ ورداسىندا بارلىعى تىنىش، ادەتتەگى بويىنشا جۇمىس ىستەپ جاتىرمىز دەۋدە. تەك دەنساۋلىعىنىڭ ناشارلاۋىنا بايلانىستى جۇمىستان كەتىپ، كەيىن قايتا كەلىپتى. سونىمەن قاتار وسى كۇنگە دەيىن بىردە-ءبىر ۇستازدان باقىر تيىندا الماعانىن ايتادى.

«ءيا، مەن دەنساۋلىعىما بايلانىستى ءوتىنىش بەرگەم، سوتقا بەرىپ قايتادان ءوز ورنىما كەلدىم. سوت شەشىمىمەن كەشەدەن باستاپ جۇمىس باستاپ جاتىرمىن. - ءسىز دەنساۋلىعىڭىزعا بايلانىستى كەتتىڭىز بە، الدە ۇستىڭىزدەن ءىس قوزعالدى ما؟ - ەشقانداي ءىس قوزعالعان جوق، مەنىڭ ارنايى ادۆوكاتىم بار. سول كىسى جاۋاپ بەرەدى. مەن تەك سوت شەشىمىمەن كەلگەنىمدى ايتا الامىن»، دەيدى №125 مەكتەپتىڭ ديرەكتورى اسەت ساتىبالديەۆ.

ءبىلىم باسقارماسىنىڭ باسشىسى جانات تاجيەۆا دا ساتىبالديەۆتىڭ ورنىنا قايتادان ديرەكتور بولىپ كەتۋىنە قارسىمىن دەپ وتىر. سوندىقتان جوعارعى سوتقا كاساتسيالىق شاعىم ءتۇسىرىپتى. ونىمەن قوسا ەكىنشى ديرەكتور دا وڭايلىقپەن بەرىسپەيمىن دەپ بىلەك سىبانا كىرىسىپ وتىر. قالاي بولعاندا دا شيەلەنىسكەن ماسەلەنىڭ شەشىمىن ەندى سوتتاعىلار شەشەتىن بولادى.

"ادىرنا" ۇلتتىق پورتالى

پىكىرلەر