Shymkentte bir mekteptiń qos dırektory bar. Qaladaǵy №125 oqý ornynyń ata-analary jáne muǵalimderi bul jaǵdaıdy múldem túsine almaıdy. Sebebi oqýshylardyń attestatynda birinshi dırektordyń qoly tursa, al tabelde ekinshi basshynyń aty-jóni jazylǵan. Munymen oqý ordasyndaǵy bylyq biter emes, qıt etse aqsha jınaýdy ádetke aınaldyryp alǵan dırektor barlyǵyn mezi qylyp bitirgen, dep habaralaıdy «Adyrna» ulttyq portaly «Eýrazııa» birinshi arnasyna silteme jasap.
Qaladaǵy bilim basqarmasynyń aldyna jınalǵan №125 mekteptiń ata-analary men muǵalimderi oqý ordasynda bolyp jatqan jaǵdaıdy sheship berýdi talap etýde. Ondaǵy máseleleri - bir mektepte eki dırektordyń jaıǵasyp alǵandyǵynda. 2017 jyldan beri mektep basshysy bolyp kele jatqan Áset Satybaldıevtyń ústinen is qaralyp, aǵymdaǵy jyl óz erkimen jumystan ketken eken. Al onyń orynyna kelgen dırektor bar-joǵy jarty jyl jumys istegen. Ótken apta oǵan bilim basqarmasynan eskertýsiz kelip, qaıtadan Áset Satybaldıevtyń dırektor bolatyny aıtylǵan. Biraq tek aýyzsha túrde.
«Men ol týraly múldem beıhabar boldym. Qalalyq bilim basqaramasynan habarlady osyndaı-osyndaı jumys ornyndasyz ba dedi. Iıa dedim. Ne másele degen edim. Osyndaı dırektordy Satybalıevty aparyp taǵaıyndaımyz dedi. Bir saǵat kóleminde keldi taǵaıyndap ketti. Eshqandaı qujatqa qol qoıǵan joqpyn. Biraq búgingi tańda 10-da qalalyq bilim bóliminiń basqarmasynan kadr bólimi habarlasty. Kelip buıryqqa qol qoıyp ketińiz dedi. Men qazir stoıonardamyn dedim. Odan shyqpaıynsha eshqaıda qol qoımaımyn», - deıdi №125 mekteptiń dırektory Arapbaı Ýrısov.
Al mektep muǵalimderi men ata-analar Áset Satybadıevtyń qaıtadan dırektor bolyp kelýine úzildi-kesildi qarsy. Sebebi ol bilim berý mekemesiniń basshysy bolǵan kezde aqsha jınaýdy ádetke aınaldyryp aldy deıdi muǵalimder. Qıt etse qaltasyn qampaıtyp alǵysy kelip turatyn dırektor oıyna kelgendi istep, mektepti oırańdatyp bitti dep ashynyp otyr. Al mektepti támamadaǵan oqýshylardyń ata-analary attestat pen tabelde eki dırektordyń qoly turǵanyna narazy.
«Qyzymnyń sońǵy emtıhanynan keıin tabel daıyn bolǵan. Biraq endi dúısenbi bizde shaqyrǵanan keıin attestatta basqa famılııa tur. Kimniń famılııasy tur? Satybaldıevtiń famılııasy tur. Tabelde Ýrýsovtyń famılııasy tur. Endi meniń qyzymnyń bolashaqta oqý ornyna túsý úshin bul áser ete ma etpeı me? Ata-analar tarapynan sondaı túsinispeýshilik bolyp tur», - deıdi qala turǵyny Kámshat Jaqypbaeva.
Al jaqynda qaıta dırektor bolǵan Áset Satybadıev oqý ordasynda barlyǵy tynysh, ádettegi boıynsha jumys istep jatyrmyz deýde. Tek densaýlyǵynyń nasharlaýyna baılanysty jumystan ketip, keıin qaıta kelipti. Sonymen qatar osy kúnge deıin birde-bir ustazdan baqyr tıynda almaǵanyn aıtady.
«Iá, men densaýlyǵyma baılanysty ótinish bergem, sotqa berip qaıtadan óz ornyma keldim. Sot sheshimimen kesheden bastap jumys bastap jatyrmyn. - Siz densaýlyǵyńyzǵa baılanysty kettińiz be, álde ústińizden is qozǵaldy ma? - Eshqandaı is qozǵalǵan joq, meniń arnaıy advokatym bar. Sol kisi jaýap beredi. Men tek sot sheshimimen kelgenimdi aıta alamyn», deıdi №125 mekteptiń dırektory Áset Satybaldıev.
Bilim basqarmasynyń basshysy Janat Tájıeva da Satybaldıevtiń ornyna qaıtadan dırektor bolyp ketýine qarsymyn dep otyr. Sondyqtan joǵarǵy sotqa kasaııalyq shaǵym túsiripti. Onymen qosa ekinshi dırektor da ońaılyqpen berispeımin dep bilek sybana kirisip otyr. Qalaı bolǵanda da shıelenisken máseleniń sheshimin endi sottaǵylar sheshetin bolady.
"Adyrna" ulttyq portaly
