قازاقستان پرەزيدەنتى قىتايدىڭ China Daily باسىلىمىنا ماقالا جاريالاپ، ەكى ەل اراسىنداعى تاريحي دوستىق پەن ستراتەگيالىق سەرىكتەستىكتى اتاپ ءوتتى، دەپ حابارلايدى "ادىرنا" ۇلتتىق پورتالى.
مەملەكەت باسشىسىنىڭ ماقالاسىنا سايكەس، قازاقستان مەن قىتاي بۇگىندە كوپقىرلى ءارى ءوزارا ءتيىمدى ىنتىماقتاستىقتىڭ ۇلگىسىن كورسەتىپ وتىر.
قىتاي قازاقستاننىڭ ەڭ ءىرى ساۋدا-ەكونوميكالىق سەرىكتەسىنە اينالدى. 2024 جىلى ەكى ەل اراسىنداعى تاۋار اينالىمى رەكوردتىق 44 ملرد دوللارعا جەتكەن. 2005 جىلدان بەرى قىتايلىق كومپانيالار قازاقستان ەكونوميكاسىنا 27 ملرد دوللاردان استام ينۆەستيتسيا سالدى. قازىرگى ۋاقىتتا ەلىمىزدە 6 مىڭعا جۋىق قىتايلىق قاتىسى بار كاسىپورىن جۇمىس ىستەيدى.
توقاەۆ قازاقستاننىڭ ء«بىر بەلدەۋ، ءبىر جول» باستاماسىنداعى ماڭىزدى ءرولىن اتاپ ءوتتى. ترانسكاسپي حالىقارالىق كولىك ءدالىزى ەلىمىزدى قىتاي، ورتالىق ازيا جانە ەۋروپانى جالعايتىن نەگىزگى ترانزيتتىك حابقا اينالدىرعان. 2024 جىلى ىسكە قوسىلعان دوستىق–مويىنتى تەمىرجول جەلىسى ءدالىزدىڭ وتكىزۋ قابىلەتىن بەس ەسە ارتتىردى. سونداي-اق سياندا ساۋدا-لوگيستيكالىق ورتالىق، اقتاۋ پورتىندا قىتايلىق ليانيۋنگانمەن بىرلەسكەن كونتەينەرلىك حاب اشىلدى.
ەنەرگەتيكا سالاسىندا قازاقستان – قىتاي مۇناي قۇبىرىنىڭ كەڭەيۋى مەن مۇناي وڭدەۋ زاۋىتتارىن جاڭعىرتۋ جوبالارى جۇزەگە اسۋدا. اۋىل شارۋاشىلىعى بويىنشا 2024 جىلى قازاقستاندىق ءونىم ەكسپورتى قىتايعا 10 پايىزعا ارتقان. قىتاي ينۆەستورلارى كوكونىس، استىق جانە ماقتا وڭدەۋ جوبالارىنا بەلسەندى قاتىسۋدا.
2024 جىل قىتايداعى «قازاقستان تۋريزم جىلى» رەتىندە تابىستى ءوتتى. ال 2025 جىل قازاقستانداعى «قىتاي تۋريزم جىلى» بولىپ جاريالانىپ، ەكى حالىق اراسىنداعى مادەني بايلانىستى نىعايتا تۇسپەك.
قازاقستان مەن قىتاي شانحاي ىنتىماقتاستىق ۇيىمى اياسىندا دا بەلسەندى ارىپتەستىك ورناتىپ وتىر. پرەزيدەنت توقاەۆتىڭ ايتۋىنشا، الداعى ۋاقىتتا تيانتسزيندە وتەتىن شىۇ ءسامميتى ەۋرازياداعى تۇراقتىلىق پەن وركەندەۋگە جاڭا سەرپىن بەرەدى.
