بۇگىن اۋدان ورتالىعىندا قاسكەلەڭدىكتەر مەن قالا قوناقتارىنا ارنالعان تاعى ءبىر «Jar-jar» دەپ اتالاتىن ساۋدا جانە تاماقتانۋ ورتالىعى اشىلدى، دەپ حابارلايدى karasayinfo.kz جەلىلىك باسىلىمى.
ورتالىقتىڭ سالتاناتتى راسىمىنە قوعام قايراتكەرى، مەتسەنات بولات ءابىشۇلى مەن اۋدان اكىمىنىڭ مىندەتىن اتقارۋشى ايجان نۇردىلداقىزى قاتىسىپ، ونىڭ لەنتاسىن قيدى. ءوز كەزەگىندە اۋدان باسشىسىنىڭ مىندەتىن اتقارۋشى «كاسىپكەرلىك نىسان ەل يگىلىگىنە قىزمەت ەتسىن، الداعى ۋاقىتتا قاراسايلىقتاردىڭ سۇيىكتى ورنىنا اينالسىن» دەگەن ىزگى تىلەگىن جەتكىزدى.
جالپى، 1200 شارشى مەتردى الىپ جاتقان عيماراتتىڭ ىشىندە ساۋدا ورتالىعى جانە شىعىس باعىتىنداعى شايحانا بار. يگىلىكتى باستامانى قولعا الىپ، اتالعان نىساندى اشىپ وتىرعان گۇلميرا بولاتقىزى وسى كاسىپتىڭ ارقاسىندا 30-عا جۋىق ادامدى جۇمىسپەن قامتىپ وتىرعانىن دا ايتا كەتكەن ءجون. ءبىرىنشى قاباتتا ورنالاسقان ساۋدا ورتالىعىنان تۇرعىندارعا قاجەتتى ازىق-تۇلىك پەن كەرەك-جاراقتىڭ بارلىعى تابىلادى، سونىمەن قاتار، ءيىس سۋلار مەن بالارلار ويىنشىقتارى دا ساتىلادى. باعاسى دا قولجەتىمدى. سۋپەرماركەت 24 ساعات جۇمىس ىستەۋگە شەشىم قابىلداپ، كەلۋشىلەردىڭ قولايلىعى ءۇشىن بارلىق جاعدايدى قاراستىرعان.
ال، Lounge bar-عا كەلەر بولساق، ونىڭ ىشكى ديزاينى زاماناۋي ستيلدە جابدىقتالىپتى. ەكىنشى قاباتتاعى شايحانا بولسا، شىعىس باعىتىنا نەگىزدەلگەن. ەجەلگى سارايلار سەكىلدى ەرەكشە ەسىكتەرمەن، كونە جادىگەرلەرمەن، اق جانە قىزىل زالدارمەن، شىعىس ساۋلەتىمەن بەزەندىرىلگەن. كىرەبەرىستەن-اق، قاپتارعا سالىنعان ءتۇرلى جاڭعاقتار مەن كەپتىرىلگەن جەمىستەر بىردەن كوزگە تۇسەدى. مۇنى دا جاڭاشىلدىققا بالاۋعا بولادى. داياشىلاردىڭ كيىمدەرى ادەتەگى تاماقتاندىرۋ ورنىنان استە بولەك. ولاردىڭ شىعىس حالقىنىڭ ۇلتتىق كيىمدەرىن كيگەندەرى، كەلۋشىلەردى سول ەلدە وتىرعانداي اسەرگە بولەپ تۇرعانداي بولادى. مۇندا كەلگەن قوناقتار ەڭ ءدامدى پالاۋ، تاندىردا پىسكەن سامسا، ءتۇرلى لاعماندار جانە تاعىدا باسقا شىعىس تاعامدارىنا تاپسىرىس بەرە الادى.
قاسكەلەڭنىڭ سولتۇستىك بولىگىندە اشىلعان زاماناۋي نىسان الداعى ۋاقىتتا ەل يگىلىنە قىزمەت ەتەدى دەگەن سەنىمدەمىز.
