تاۋەلسىزدىك جىلدارى ەلىمىزدە جەكەمەنشىك قۇرىلىس ۇيىمدارى قانات جايىپ، سالانىڭ دامۋىندا شەشۋشى ورىندى يەلەندى. جامبىل اۋدانىندا دا مۇنداي كاسىپورىندار قۇرىلىس سالاسىندا تابىستى جۇمىس ىستەيدى. سولاردىڭ ءبىرى – «REM PLAST LTD» جاۋاپكەرشىلىگى شەكتەۋلى سەرىكتەستىگى.
ماناس قالياقوۆ بۇل ۇيىمدى 2006 جىلدىڭ قاڭتار ايىندا قۇرعان بولاتىن. باستاعان ءىسىن اياعىنا دەيىن جەتكىزبەي تىنىم تاپپاۋعا داعدىلانعان كاسىپكەر ناتيجەگە جەتۋ ءۇشىن كۇن، ءتۇن دەمەي ەڭبەكتەندى. جەكەمەنشىك مەكەمەسىنىڭ ۇيىمداستىرۋ جۇمىستارىن دۇرىس جولعا قويا ءبىلدى. قولىنان ءىس كەلەتىن بىلىكتى مامانداردى تارتا ءبىلۋ دە وڭايعا سوققان جوق. قايسار كاسىپكەردىڭ توككەن تەرى زايا كەتپەدى. بۇگىندە ازدى-كوپتى ناتيجەگە قول جەتكىزسە – سول ەڭبەكتىڭ اقتالعانى.
ماناس ومىرزاقۇلىنىڭ كومپانياسىندا بۇگىندە 14 ادام تۇراقتى جۇمىسپەن قامتىلعان. ماۋسىمدىق كەزەڭدە ناقتى جۇمىستىڭ كولەمىنە قاراي جۇمىسشىلار سانى قاجەتىنشە 140 ادامعا دەيىن وسەدى. قۇرىلىس-جوندەۋ جۇمىستارىمەن اينالىساتىن ۇيىمدا ءوز ءىسىنىڭ ناعىز بىلگىرلەرى ەڭبەك ەتەدى. ولاردىڭ ىشىندە باس ەنەرگەتيك مۇرات ەسقايىروۆ، پروراب عالىمجان مولداقوجاەۆ، ۋچاسكە باستىعى دانيل مۇقانوۆ، لوگيستيكا ءبولىمىنىڭ باسشىسى مەيرامبەك ومىرزاق سياقتى ماماندار وسىندا بىرنەشە جىلدان بەرى جەمىستى جۇمىس ىستەپ كەلەدى. بۇدان باسقا دا ءارتۇرلى تەحنيكالاردى تىزگىندەگەن جۇمىسشىلاردىڭ ورتاق ىسكە كۇش بىرىكتىرۋىنىڭ ارقاسىندا مەكەمە جۇمىسى ىلگەرىلەۋدە.
«REM PLAST LTD» جاۋاپكەرشىلىگى شەكتەۋلى سەرىكتەستىگى تەك جامبىل اۋدانىندا عانا ەمەس، وسى ۋاقىتقا دەيىن وزگە وڭىرلەردە بىرقاتار نىساننىڭ قۇرىلىسىن جۇرگىزدى. اتاپ ايتقاندا، تۇركىستان قالاسىنداعى مەديا ورتالىق، دراما تەاترى عيماراتتارىنىڭ قۇرىلىسىنا قاتىستى. الماتى قالاسىندا بىرنەشە نىساننىڭ قۇرىلىسىن ساپالى اياقتادى. وتكەن جىلى جۇمىسىن قارقىندى جۇرگىزىپ، قولعا العان مەملەكەتتىك تاپسىرىستى ويداعىداي ورىنداپ شىقتى. دالىرەك ايتقاندا، بالقاش اۋدانىندا 11 مەكتەپتىڭ اعىمداعى جوندەۋ جۇمىستارىن جاسادى. سونداي-اق، ۇزىناعاش اۋىلىندا «قامقورلىق» وڭالتۋ ورتالىعىنا بولىنگەن ەكى قاباتتى عيماراتتى كۇردەلى جوندەۋدەن وتكىزىپ، مۇمكىندىگى شەكتەۋلى بالالارعا ارنالعان مەكەمەنى تالاپقا ساي جابدىقتادى. اتالعان وڭالتۋ ورتالىعى وبلىس بويىنشا ەرەكشە ۇلگىدەگى العاشقى مەكەمە بولىپ سانالادى.
سەرىك ساتىبالديەۆ
جامبىل اۋدانى
