ۋكراينا شىعىس ەۋروپاداعى ناتو ەلدەرى اسكەرىنىڭ وقۋ-جاتتىعۋلارىنا ارنالعان ەڭ ۇلكەن پوليگونعا اينالىپ كەلەدى. وسى جىلدىڭ وزىندە مۇندا 11 مىڭ شەتەلدىك اسكەري قىزمەتشىنىڭ قاتىسۋىمەن جەتى كوپۇلتتى وقۋ-جاتتىعۋ وتەدى، دەپ جازدى ريا نوۆوستي.
اقش (Rapid Trident 2021 جانە Sea Breeze 2021), ۇلىبريتانيا (Kozak Mace 2021 جانە Warrior Watcher 2021), پولشا ("تري مەچا — 2021" جانە Silver Saber 2021) جانە رۋمىنيامەن (Riverine 2021) بىرلەسكەن مانەۆرلەر ۋكراينا اۋماعىندا وتەدى دەپ جوسپارلانىپ وتىر.
الايدا كەيبىر ساراپشىلار ناتو اسكەرىن ۋكراينا اۋماعىندا ورنالاستىرۋ مەملەكەتتىڭ تاۋەلسىزدىگىنە جانە ايماقتىق بىرتۇتاستىعىنا قاۋىپ ءتوندىرۋى مۇمكىن دەپ سانايدى. اقش پەن ناتو-نىڭ باسقا ەلدەرى دە ۋكراينادا ورنالاسۋ پۋنكتەرى جۇيەسىن قۇرىپ جاتىر. ولاردى تولىققاندى اسكەري بازاعا اينالدىرۋ تۇك ەمەس. بۇل ارەكەتەر ماسكەۋدى ءبىرشاما الاڭداتىپ وتىر.
ريا نوۆوستي ساۋالناما العان اسكەري ساراپشىلار ۋكراينا بۇل جاعدايدىڭ رەسەيمەن قارۋلى قاقتىعىسقا دەيىن ۋشىعۋىنا جول بەرمەۋى كەرەك دەپ سانايدى.
"اسكەري جانە ەكونوميكالىق الەۋەتتەر تەڭ ەمەس، - دەيدى سوكولوۆ. – بۇل ماسەلەدە ارانداتۋ دا كوپ. ايتسە دە ناعىز ۇلتشىل ازاماتتاردىڭ وزىندە جاعدايدى ۋشىقتىرماۋ، ءوزىن-ءوزى قورعاۋ ينستينكتى قوسىلادى دەپ ويلايمىن".
يادرولىق دەرجاۆا سانالاتىن مەملەكەتكە شابۋىل جاساۋ ءۇشىنشى دۇنيەجۇزىلىك سوعىسقا اكەپ سوعاتىنىن بۇگىندە بارلىعى جاقسى تۇسىنەدى. بۇل سوعىستا جەڭگەندەر مەن جەڭىلگەندەر بولمايتىنى انىق.
"بايدەن رەسەيگە اشىق سوعىسقا بارمايدى. الايدا ۋكراينا باعىتىندا بىرقاتار قاراجات سالىپ وتىرعاندىقتان، بۇل تاراپتى ءوز پايداسىنا قولدانا بەرەدى. ونىڭ ۇستىنە بۇل قارسىلاستىق ەۋروپاعا دا وڭاي تيمەيتىنى انىق. قازىرگى ەۋروپا بەس جىل بۇرىنعى قۇرلىقتان مۇلدە باسقا" – دەيدى اسكەري عىلىمدار اكادەمياسىنىڭ مۇشەسى سەرگەي سۋداكوۆ.
راسىندا دا ەۋروپا كەڭىستىگىندە جاعداي باياعىداي ەمەس. بۇرىنعى ۆارشاۆا كەلىسىمى ەلدەرى مەن بالتىق ماڭى حالقى دا ورىستاردى الەمنىڭ جاۋى رەتىندە ساناۋدى دوعارعان. مۇنى ۆاشينگتون دا ءتۇسىنىپ وتىر.
"الداعى ۋاقىتتا وتەتىن بايدەن مەن ءپۋتيننىڭ كەزدەسۋى باتىس الەمنىڭ كوشباسشىسى رەتىندە اقش-تىڭ ساياساتتى وزگەرتەتىن ۋاقىت كەلگەنىن تۇسىنگەنىن بىلدىرەدى. امەريكالىقتار رەسەيگە قاتىستى نەگىزگى ۇستانىمدارىنان باس تارتپاعانىمەن، ەكونوميكا مەن حالىقارالىق ءوزارا ءىس-ارەكەت باعىتىنداعى پروبلەمالاردى جەڭىلدەتۋ ادىستەرىن ۇسىنادى. ۆاشينگتون ءۇشىن قازىر اليانس بويىنشا وداقتاستارىنان ايىرىلىپ قالماۋ ماڭىزدى", - دەيدى ساياساتتانۋشى.
بۇل نۇسقانى ناتو-نىڭ ۋكرايناداعى جوعارى اسكەري بەلسەندىلىگى دە راستاپ وتىر. بەينەبىر كەلىسسوزدەر پوزيتسياسىن كەز كەلگەن ۋاقىتتا كۇش قولدانۋعا وزگەرتە الاتىن ايباتتى كورسەتۋ سەكىلدى.
