پولياك قۇرلىق اسكەرلەرىنىڭ بۇرىنعى قولباسشىسى، گەنەرال ۆالدەمار سكشيپچاك ادامزاتتىڭ بولاشاقتا ءبىزدى ولتىرەتىن نارسە جاسايتىنىن ايتتى، دەپ حابارلايدى «ادىرنا» ۇلتتىق پورتالى.
ۇرىس الاڭىندا جاساندى ينتەللەكتتى قولدانۋ تۋرالى ايتا وتىرىپ، سكشيپچاك تەحنولوگيانى باقىلاۋدى جوعالتپاۋ ءۇشىن، ادامزاتتى ولتىرەتىن نارسە جاساماۋ ءۇشىن زاڭنامالىق بازا قاجەت دەدى.
بۇۇ قاۋىپسىزدىك كەڭەسىنىڭ ليۆيا تۋرالى ەسەبىندە وسى جىلدىڭ ناۋرىز ايىندا تۇرىكتىڭ «كارگۋ-2» درونىنىڭ جاۋدىڭ كونۆويلارىنا سوققى بەرگەنى تۋرالى اقپارات پايدا بولدى. ايتا كەتەيىك، درون بىرنەشە جىلدان بەرى ءار ءتۇرلى اسكەري قاقتىعىستاردا قولدانىلىپ كەلەدى.
«پولياك ارمياسى اۋعانستانداعى ميسسياعا دايىندالىپ جاتقاندا، ءبىز دايىندىققا باردىق. دايىندىق بارىسىندا ءبىزدىڭ اسكەريلەر جاۋىنگەرلىك روبوتتارمەن ءوزارا ارەكەتتەسۋدى ۇيرەندى. سودان كەيىن بىزدە «روبوت ءوز ساربازىن بەيتانىس ادامنان قالاي اجىراتادى؟» دەگەن سۇراق تۋىندادى. وپتوەلەكترونيكا وسى ۋاقىتقا دەيىن قارقىندى دامىدى. جۇيەلەر وبەكتىلەر مەن ادامداردى انىق انىقتاي الادى.
بۇل، مىسالى، داتچيكتەر ءارتۇرلى ەتنيكالىق توپتاردىڭ وكىلدەرىنە ءتان بەلگىلەردى اجىراتا الادى دەگەن ءسوز. كەيدە ءبىز ەۋروپالىقتى تاياۋ شىعىستىڭ تۇرعىنىنان اجىراتا المايمىز. ال ماشينالار بۇنى قازىردىڭ وزىندە جاساي الادى»، - دەيدى ول.
ۆالدەمار سكشيپچاك مۇنداي قارۋدى قولدانۋ شەكتەۋلىگى تۋرالى ويلانۋىمىز كەرەكتىگىن دە ايتىپ ءوتتى.
«مۇنداي قارۋدى قولدانۋدىڭ شەكتەۋلىگى تۋرالى ويلانۋىمىز كەرەك. ويتكەنى ەگەر كۇن ساناپ دامىپ كەلە جاتقان جاساندى ينتەللەكت ادام ءولتىرۋ ءۇشىن قولدانىلسا، ءبىر كۇنى ادامدار ولاردى باقىلاۋدى جوعالتۋى مۇمكىن. مۇمكىن ءبىز ءوزىمىزدى بولاشاقتا ولتىرەتىن نارسەنى جاسايتىن شىعارمىز»، - دەيدى گەنەرال.
"ادىرنا" ۇلتتىق پورتالى
