2017 جىلعى 19 قازاندا ۇلتتىق مۋزەيدىڭ ەتنوگرافيا زالىندا مۋزەي پەداگوگيكاسى جانە بالالار شىعارماشىلىعى ءبولىمىنىڭ ۇيىمداستىرۋىمەن «قازاقتىڭ تۇرمىستىق بۇيىمدارى» تانىمدىق كۆەست ساباعى ءوتتى.
ساباققا استانا قالاسىنداعى №83 مەكتەپ-گيمنازيانىڭ 6 سىنىپ وقۋشىلارى قاتىسىپ،تۇرمىستىق بۇيىمدار تۋرالى جان-جاقتى اقپارات الدى. اتا-بابالارىمىزدىڭ تۇرمىسى مەن ءداستۇرلى مادەنيەتىنە، قازاق حالقىنىڭ سان عاسىرلىق تاريحىنا كۋا بولعان قاسيەتتى، كيەلى قارا شاڭىراق – كيىز ءۇي جانە ونىڭ ىشكى-سىرتقى جابدىقتارىمەن تانىسىپ، ارنايى بەرىلگەن تاپسىرمالار ارقىلى ۇلتتىق قۇندىلىقتاردى تاني ءتۇستى.
ساباق بارىسىندا كيىز ءۇيدىڭ ەجەلگى ءومىر سۇرگەن كوشپەلى حالىقتىڭ قىسى-جازى وتىراتىن، وتە قولايلى جانە ءتوزىمدى، ءبىر شەگەسىز جينالىپ، ءبىر شەگەسىز قۇرىلاتىن، قىستا جىلى، جازدا سالقىن، كوشىپ-قونۋعا ىڭعايلى جىلجىمالى تۇرمىستىق نەگىزگى باسپاناسى بولعاندىعى تۋرالى كەڭىنەن ايتىلدى.
قۇندى ماعلۇماتتى قىزىعا تىڭداعان وقۋشىلار كيىز ءۇي تەك قازاق حالقىنىڭ عانا ەمەس، بۇكىل تۇركى، ءتىپتى وعان كورشىلەس ەلدەردىڭ دە تۇراق-مەكەنى بولعانىن ۇعىنىپ، سوزجۇمباق شەشىپ، ءتۇرلى سۇراقتارعا تالاسا جاۋاپ بەرىپ، ساباققا بەلسەنە قاتىستى.
http://nationalmuseum.kz