بۇگىن قر رامىزدەر كۇنى. مەملەكەتتىك رامىزدەردىڭ ءمان-ماعىناسىن مەكتەپ قابىرعاسىنان باستاپ-اق بىلەمىز. تۋدىڭ تۇسىنەن باستاپ، ەلتاڭبانىڭ ماڭدايشاسىنداعى جۇلدىزعا دەيىن شولۋ جاساعانىمىز ەستەرىڭىزدە شىعار. كەز كەلگەن ءرامىزدىڭ وزىندىك ماعىناسى بار. دەي تۇرعانمەن، ماعىنا ءبىر بولەك تە، ەرەكشەلىك ءبىر بولەك. ولاي بولسا، نازارلارىڭىزعا الەمدەگى ەرەكشە تۋلار ءتىزىمىن ۇسىنامىز.
قۇبىلمالى ءرامىز
ەستىمەگەن ەلدە كوپ. ءفيليپپيننىڭ تۋى قۇبىلمالى. “قالاي؟” دەپ تاڭىرقاماي تۇرا تۇرىڭىز. ەگەر قىزىل جولاق جوعارى، كوك جولاق تومەن ورنالاسسا ەلدە قوي ۇستىنە بوزتورعاي جۇمىرتقالاعان بەيبىتشىلىكتىڭ سالتانات قۇرعانى. ەلدە سوعىس سىندى قاتەرلى جاعداي بولا قالسا، كوك ءتۇس جوعارعى بولىكتە ورنالاساتىن كورىنەدى.
بالانىڭ تۋىندىسى
ال، ءسىز نورۆەگيا تۋىنىڭ نەگىزگى اۆتورى بالا ەكەنىن بىلەسىز بە؟
وقيعا 1814 جىلى بولعان. تاريحي دەرەكتەردە تۋدىڭ اۆتورى فرەدەري مەلتسەردىڭ ۇلى گەرحارد ەكەنى ايتىلعان. وقيعا بىلاي بولعان. دانيا ەلىنىڭ تۋىمەن ويناپ وتىرعان ءبۇلدىرشىن كوك بوياۋمەن اق ءتۇستىڭ ءۇستىن سىزا باستايدى. مۇنى كورگەن اكەسى ۇلىنىڭ يدەياسىن ۇناتادى. وسىلايشا، قىزىل، اق جانە كوك تۇستەردىڭ ورتاق قوسىندىسىنان ءبۇتىن ءبىر مەملەكەتتىڭ رامىزى ومىرگە كەلەدى.
تۋدىڭ ءبارى تىكتورتبۇرىشتى ەمەس
تۋ دەسە كوز الدىمىزعا تىك ءتورتبۇرىشتى فيگۋرا ەلەستەيدى. بۇل سويلەمنىڭ نەپالعا ەش قاتىسى جوق. سەبەبى، بۇل مەملەكەتتىڭ تۋىنىڭ ءپىشىنى ەكى ءۇشبۇرىشتى فيگۋرانىڭ قوسىندىسى.
انتاركتيدانىڭ دا تۋى بار
ال انتاركتيدادا مەملەكەتتىك بولماسا دا تۋ بار. مۇنىڭ ءوزى نەيترالدى تەرريتوريا ەكەنىن كورسەتىپ تۇرعانىن قارامايسىزدار ما؟
بالانىڭ يدەياسى ەمەس
بۇل ەلدىڭ تۋى بالا قيالىنىڭ تۋىندىسى دەرسىز. دەسە دە ولاي ەمەس. كيريباتيدىڭ مەملەكەتتىك رامىزىنەن تەك تولقىندى تەڭىزدى عانا ەمەس، سونداي-اق قۇس پەن كۇندى دە كورۋگە بولادى.
اسەتوۆا نازەركە
