2021 جىلعى 2 ماۋسىمدا ءبىلىم جانە عىلىم ءمينيسترى اسحات ايماعامبەتوۆ اباي اتىنداعى قازۇپۋ-دىڭ عىلىمي كەڭەسىنە قاتىسىپ، وقۋ ورنىنىڭ جاڭا رەكتورى دارحان ءبىلالوۆتى تانىستىردى، دەپ حابارلايدى "ادىرنا" ۇلتتىق پورتالى تۇركىستان.كز سايتىنا سىلتەمە جاساپ.
مينيستر جوعارى وقۋ ورنىنىڭ بۇرىنعى رەكتورى تاكير بالىقباەۆ وتە تاجىريبەلى باسشى، بۇرىن ءبىلىم اكادەمياسىن، ۇلتتىق تەستىلەۋ ورتالىعىن باسقارعان جانە ءبىلىم جانە عىلىم ۆيتسە-ءمينيسترى بولعانىن اتاپ ءوتتى. سونىمەن قاتار ول تاكير بالىقباەۆقا جەمىستى جۇمىسى ءۇشىن، ۋنيۆەرسيتەتتى باسقارعان جىلدارى جاڭا يدەيالارمەن ومىرگە كوپتەگەن جاڭالىقتار اكەلگەنى ءۇشىن العىس ايتتى. تاكير بالىقباەۆتىڭ باسشىلىعىمەن ەلىمىزدىڭ جەتەكشى پەداگوگيكالىق ۋنيۆەرسيتەتى حالىقارالىق دەڭگەيدە دامىعاندىعى، وعان ۇلتتىق جانە حالىقارالىق رەيتينگتەردىڭ كورسەتكىشتەرى دالەل ەكەندىگى باسا ايتىلدى.
جاڭا رەكتور دارحان ءبىلالوۆ – اقش-تىڭ سولتۇستىك باتىس ۋنيۆەرسيتەتىندە جانە پەنسيلۆانيا شتاتى ۋنيۆەرسيتەتىندە ءبىلىم العان، حالىقارالىق ۇيىمداردا، نازارباەۆ ۋنيۆەرسيتەتىندە قىزمەت ىستەگەن ءبىلىمدى دە بىلىكتى مامان. كوپتەگەن عىلىمي جانە اناليتيكالىق ەڭبەكتەردىڭ اۆتورى.
ءبىلىم جانە عىلىم ءمينيسترى اسحات ايماعامبەتوۆ بۇدان ءارى ۋنيۆەرسيتەتتىڭ الدىندا تۇرعان جاڭا مىندەتتەرگە توقتالدى. قر ۇعا اكادەميگى، تاريح عىلىمدارىنىڭ دوكتورى، پروفەسسور م. قويگەلديەۆ، ۋنيۆەرسيتەت ارداگەرلەر كەڭەسىنىڭ توراعاسى، پروفەسسور ب.المۇحامبەتوۆ جانە فيزيكا-ماتەماتيكا عىلىمدارىنىڭ دوكتورى، پروفەسسور ۆ.ن.كوسوۆ ۋنيۆەرسيتەتتىڭ بۇرىنعى رەكتورى تاكير بالىقباەۆتىڭ قىزمەتىنە جوعارى باعا بەرىپ، وعان العىس ايتتى جانە وقۋ ورنىنىڭ جاڭا باسشىسى دارحان بىلالوۆكە تابىس تىلەدى.
"ادىرنا" ۇلتتىق پورتالى
