اقش-تىڭ كەنتۋككي شتاتىنىڭ حاررودسبەرگ قالاسىندا تۇراتىن ايەل كۇيەۋىمەن اجىراسىپ، قايىن اتاسىنا تۇرمىسقا شىققان، دەپ حابارلايدى "ادىرنا" ۇلتتىق پورتالى Nege.kz سايتىنا سىلتەمە جاساپ.
ەريكا كۆيگگل (Erica Quiggle) قۇربىسىنىڭ اعاسى دجاستينگە 19 جاسىندا ءتيىپتى. كۇيەۋىنىڭ جاسى ول كەزدە 27-دە بولعان ەكەن. ەكى جىلدان سوڭ ۇل بوسانادى. بىراق كوپ ۇزاماي جاس جۇبايلاردىڭ قارىم-قاتىناسىنا سىزات تۇسە باستايدى. دجاستين ۇيدەن شىقپايتىن، ازدى قاناعات تۇتاتىن بۇيىعى ادام ەكەن. ەريكا بولسا، ساياحات جاساعاندى، ءتۇرلى ءىس-شارالارعا قاتىسقاندى، ءبىر سوزبەن ايتقاندا ۇيدە وتىرماعاندى ۇناتادى.
ءبىر كۇنى قايىن اتاسى دجەفف اۆتوكولىك شوۋىن ۇيىمداستىرادى. كەلىنى بۇل شاراعا قاتىسۋعا پين-اپ ۇلگىسىندەگى كيىممەن كەلگەن. سول جەردە كەلىن مەن قايىن اتا ورتاق مۇددەلەرى بار ەكەنىن ۇعىپ، جاقىن ارالاسا باستايدى.
ەريكا قايىن اتاسىنا نەكەدەگى قيىنشىلىقتارى تۋرالى سىرىن بولىسەدى. ارادا ءبىراز ۋاقىت وتكەن سوڭ ايەل كۇيەۋىمەن اجىراسىپ، اتا-اناسىنىڭ ۇيىنە كەتەدى. بىراق كوپ ۇزاماي قايىن اتاسىنا سەزىمى ويانعانىن تۇسىنەدى.
بايقاپ كورسە، دجەفف تە كەت ءارى ەمەس كورىنەدى. بۇرىنعى كۇيەۋىنە ءمان-جايدى ايتقاندا، ول ەش قارسىلىق بىلدىرمەپتى. كۇيەۋىمەن اجىراسۋدى رەسمي تۇردە راسىمدەيتىن قۇجات-قاعازدار دايىن بولعاندا، بۇرىنعى قايىن اتا مەن كەلىن بىرگە تۇرىپ ۇلگەرىپتى.
ولار ەندى وتباسىن زاڭداستىرىپ، قىزدى بولادى. باس قوسقان كەزدە ەريكانىڭ جاسى 29-دا، ال دجەفف-ءتىڭ جاسى 58-دە بولعان.
«بۇرىنعى كۇيەۋىممەن دە ارالاسىپ تۇرامىن. ونىمەن اجىراسۋعا بەل بۋعان سوڭ عانا، مەن اكەسىمەن جۇرە باستادىم. بىراق نەكەنىڭ بۇزىلۋىنا بۇل سەبەپ بولعان جوق. دجەففپەن جاسىمىزدىڭ ايىرماشىلىعى ماحابباتىمىزعا ەش كەدەرگى بولا المايدى»، – دەيدى ەريكا.
ايتا كەتەتىن جايت، انگليادا قايىن ەنە مەن كۇيەۋ بالانىڭ، قايىن اتا مەن كەلىننىڭ نەكەگە تۇرۋىنا تىيىم سالىنعان. 2005 جىلى ستراسبۋرگتە ورنالاسقان ەۋروپانىڭ ادام قۇقىقتارى جونىندەگى سوتى مۇنى «ادام قۇقىقتارىن بۇزادى» دەپ تاپقان. سوتقا نەكەنى تىركەۋدەن باس تارتقانى ءۇشىن 40 جاستاعى كەلىنىمەن شاڭىراق كوتەرمەك بولعان 60 جاسار قايىن اتا شاعىم تۇسىرگەن ەكەن.
"ادىرنا" ۇلتتىق پورتالى
