بىشكەكتىڭ پەرۆوماي اۋداندىق سوتى 2 ماۋسىمدا بۇرىنعى پرەمەر-مينيستر ومىربەك بابانوۆقا بۇلتارتپاس شاراسىن قولدانۋ تۋرالى شەشىم قابىلدادى. ول ۇلتتىق قاۋىپسىزدىك جونىندەگى مەملەكەتتىك كوميتەتتىڭ تەرگەۋ يزولياتورىنا ەكى ايعا قامالدى. بۇل تۋرالى ازاتتىقتىڭ قىرعىز قىزمەتى حابارلادى، دەپ جازادى ازاتتىق.
بۇعان دەيىن سۋديا ەكس-پرەمەردىڭ زاڭدى ۇستالعانىن اتاپ ءوتىپ، قورعاۋ تارابىنىڭ سۋديانى اۋىستىرۋ تۋرالى ءوتىنىشىن قاناعاتتاندىرماعان.
بابانوۆتىڭ ءوزى تاعىلعان ايىپتاردى "ساندىراق" دەپ اتاعان.
31 مامىردا مەملەكەتتىك ۇقك بۇرىنعى پرەمەر-مينيستر ومىربەك بابانوۆتى ۇستاعان. كوميتەتتىڭ ءباسپاسوز قىزمەتىنىڭ حابارلاۋىنشا، وعان "قۇمتور" جوباسىمەن بايلانىستى جەمقورلىق بابى بويىنشا ايىپ تاعىلعان.
"قۇمتور ءىسى" بويىنشا سونىمەن بىرگە جوگوركۋ كەڭەش دەپۋتاتتارى اسىلبەك جەەنبەكوۆ، توروباي زۋلپۋكاروۆ، ەكس-دەپۋتاتتار ىسقاق پيرماتوۆ پەن تالانتبەك ۋزاكباەۆ تا ۇستالدى. ولار دا ەكى ايعا قامالعان.
"رەسپۋبليكا" پارتياسىنىڭ قۇرۋشىسى جانە ەكس-ليدەرى بابانوۆ 2011-2012 جىلدارى قىرعىزستان پرەمەرى بولعان. 2017 جىلى پرەزيدەنت سايلاۋىنا قاتىسىپ، ەكىنشى ورىن العان. سايلاۋدان سوڭ ول ساياسي كارەراسىن اياقتايتىنىن ايتىپ، ماسكەۋگە كەتكەن ەدى. 2019 جىلى تامىزدا ول قىرعىزستانعا ورالعان.
بابانوۆ قىرعىزستانعا كەلگەن سوڭ ۇقك مەن قارجى پوليتسياسىنا بىرنەشە رەت تەرگەۋگە شاقىرىلعان. 2020 جىلى 29 تامىزدا كەزەكتى تەرگەۋدەن كەيىن ول ازاتتىقتىڭ قىرعىز قىزمەتىنە "سەگىز قىلمىستىق ءىس بويىنشا جاۋاپ بەرىپ جاتقانىن" ايتقان. بيىل ناۋرىزدا ۇقمك بابانوۆقا قاتىستى قوزعالعان ءىس توقتاتقانىن، ول مەملەكەتكە قولداۋ رەتىندە 100 ملن سوم اۋدارعانىن مالىمدەگەن.
