دۇنيەجۇزىلىك دەنساۋلىق ساقتاۋ ۇيىمى مالىمدەگەندەي، 2022 جىلى الەمدە كوروناۆيرۋسقا قارسى ۆاكتسينا ەگۋ ءۇشىن قولدانىلاتىن ارنايى مەديتسينالىق شپريتستەردىڭ جەتىسپەۋشىلىگى بولۋى مۇمكىن، دەپ حابارلايدى "ادىرنا" ۇلتتىق پورتالى.
Lenta.ru سايتىنىڭ حابارلاۋىنشا، بيىلعى جىلى 6,8 ميللياردتان استام ادامعا Covid-19 ۆاكتسيناسى سالىنعان. ال وندىرىلەتىن شپريتستەردىڭ سانى — جىلىنا 6 ميلليارد دانا.
—بۇكىل الەمدەگى وندىرۋشىلەر ءبىر رەت قولدانىلاتىن شپريتستەردىڭ ءوندىرىسىن ۇلعايتۋدىڭ جولىن تابۋى كەرەك. ەگەر قولدانىلاتىن جانە وندىرىلەتىن مەديتسينالىق قۇرالداردىڭ مۇنداي ارا-قاتىناسىن تۇزەتپەسە، الەم 2022 جىلى ولاردىڭ تاپشىلىعىنا تاپ بولۋى مۇمكىن، ال جەتىسپەۋشىلىك ەكى ميلليارد شپريتسكە جەتۋى مۇمكىن، – دەدى ددۇ ءدارى-دارمەكتەر مەن دەنساۋلىق ساقتاۋ ونىمدەرىنە قول جەتكىزۋ جونىندەگى اعا كەڭەسشىسى ليزا حەدمان.
ونىڭ ايتۋىنشا، شپريتستەردىڭ جەتىسپەۋشىلىگى بۇكىل الەمدە بالالاردى ۆاكتسينالاۋدىڭ كەشىگۋىنە اكەلۋى مۇمكىن، سونىمەن قاتار كەدەي ەلدەر ينەلەردى قايتا پايدالانۋعا ءماجبۇر بولادى، بۇل — وتە قاۋىپتى تاجىريبە.
شپريتستەردىڭ بولماۋى باسقا اۋرۋلارعا قارسى ادەتتەگى ەگۋلەرگە تەرىس اسەر ەتۋى مۇمكىن. لوگيستيكا جاعىنان دا پروبلەمالار تۋىنداۋى مۇمكىن. شپريتستەر تاسىمالداۋ كەزىندە كىدىرىستەرگە كوبىرەك بەيىم، ويتكەنى ولار، مىسالى، ۆاكتسينا كولبالارىنا قاراعاندا ون ەسە كوپ ورىن الادى.
"ادىرنا" ۇلتتىق پورتالى.
