قازاقستاندا قارجى پيراميدالارىن جارنامالايتىن "جۇلدىزداردى" جاۋاپقا تارتۋ ۇسىنىلدى دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
دەپۋتات يۋري لي ءماجىلىستىڭ جالپى وتىرىسىندا مالىمدەمە جاساپ، قازاقستاندا 2020 جىلدىڭ ناۋرىزىنان 2021 جىلدىڭ ساۋىرىنە دەيىنگى ارالىقتا قارجى پيراميدالارى اياسىندا 287 قۇقىقبۇزۋشىلىق تىركەلگەنىن جانە كەلتىرىلگەن شىعىننىڭ مولشەرى 8 545 297 645 تەڭگەگە جەتكەنىن اتاپ ءوتتى.
لي قارجى پيراميدالارىنىڭ جارناماسىنا قازاقستاندىق تانىمال ادامداردىڭ كوپ قاتىساتىنىن جەتكىزدى.
"جارناماعا ۆاينەرلەر، بلوگەرلەر جانە باسقا دا تانىمال ادامدار بەلسەندى قاتىسىپ، زاڭسىز بيزنەسكە ينۆەستيتسيا سالۋعا قازاقستاندىقتاردى شاقىرعان. ولار حالىق الدىندا جۇرگەن ادامدار، اتتارىن اتاماي-اق قويايىن، سەبەبى تەرگەۋ ءجۇرىپ جاتىر، ولار "تاۋەكەلسىز ينۆەستيتسيا" ءۇشىن جوعارى كىرىستەردى ۋادە ەتكەن قارجى پيراميداسىنىڭ جارناماسىنا بەلسەندى قاتىسقاندار. ءبىزدىڭ بىلۋىمىزشە، قازىر سول اتاقتى ادامدار وزدەرى دە ينۆەستيتسيا سالعانىن جانە الاياقتىق ارەكەتتەن زارداپ شەككەنىن، قارجىلىق پيراميدالاردى ۇيىمداستىرۋشىلاردىڭ قۇربانى بولعانىن ايتادى، بىراق دەرەك ساقتالادى، ءسىز كادرلاردى جارنامادان كەسىپ تاستاي المايسىز", - دەدى دەپۋتات لي.
"بۇل رەتتەۋشىلىك تاسىلدەر مىڭداعان جابىرلەنۋشىنىڭ سانىن جانە ولارعا كەلتىرىلگەن ماتەريالدىق شىعىننىڭ مولشەرىن ەسكەرمەي وتىر، ال شىعىن - ميللياردتار. بۇل اقىرىندا، كورىپ وتىرعانىمىزداي، الەۋمەتتىك شيەلەنىس وشاقتارىن تۋعىزادى جانە تانىمال ادامدارعا قاتىستى زاڭسىز قارجىلىق تاجىريبەلەردىڭ الدىن الۋعا ىقپال ەتپەيدى. قارجىلىق پيراميدالاردىڭ جارناماسىنا قاتىسقان جۇلدىزداردىڭ اكىمشىلىك جاۋاپكەرشىلىككە تارتىلاتىنىن نە تارتىلمايتىنىن، ەگەر تارتىلماسا قانداي سەبەپپەن ەكەنىن حابارلاڭىز، باس پروكۋرور نۇرداۋلەتوۆ مىرزا", - دەدى لي.
ايتا كەتەيىك، بۇعان دەيىن قازاقستاندىق تانىمال ادامدار جارنامالاپ، قارجى پيراميدالارى ءىسىنىڭ ارتى شۋعا اينالعان بىرقاتار جايتتار بولعان ەدى. ماسەلەن، بيىل ساۋىردە الماتىلىقتار تانىمال تەلەجۇرگىزۋشى مەن ۆاينەرلەر جارنامالاپ جاتقان قارجى پيراميداسىنا شاعىمداندى.
