سولتۇستىك قازاقستان وبلىسىنداعى بەسكول اۋىلىنىڭ تۇرعىندارى بەلگىسىز دەرتكە شالدىعۋدا. ناۋقاستارعا ورتاق بەلگى – ءىش ءوتۋ، دەنە قىزۋىنىڭ كوتەرىلۋى. تۇرعىندار دەرتتىڭ دەندەۋىن ساپاسىز اۋىز سۋدان كورەدى. ال جەرگىلىكتى بيلىكتىڭ ءوز بولجامى بار دەپ حابارلايدى «ادىرنا» ءتىلشىسى «Astana TV»-گە سىلتەمە جاساپ.
قىزىلجار اۋدانىنىڭ ورتالىعى بەسكول اۋىلىنىڭ تۇرعىندارى سوڭعى ەكى اپتادان بەرى بىرىنەن سوڭ ءبىرى بەلگىسىز دەرتكە شالدىعىپ جاتىر. بىرەۋلەردە ءىش ءبۇرىپ، ديارەيا بەلگىلەرى بايقالسا، ەندى ءبىرىنىڭ جۇرەگى اينىپ، ىشكەن-جەگەن تاماعىن قابىلدامايتىن كۇيگە تۇسكەن كورىنەدى. تۇرعىنداردىڭ ايتۋىنشا، بەلگىسىز دەرتتى اۋىلدا جۇزدەن استام ادام جۇقتىرعان.
«وتكەن بەيسەنبى كۇنى تۇندە اۋىرىپ قالدىم. دەنە قىزۋىم 38,6 گرادۋسقا دەيىن كوتەرىلدى. ءىشىم قاتتى ءبۇرىپ، ىشىمدە بومبا جارىلعانداي بولدى. بەلگىلەرى كوروناۆيرۋسقا ۇقسامايدى. دارىگەرلەر دە وسىلاي دەيدى»،- دەدى بەسكول اۋىلىنىڭ تۇرعىنى گالينا پۋلنيكوۆا.
تاعى ءبىر اۋىل تۇرعىنى ەڭ الدىمەن قىزى، كەيىن ءوزى اۋىرعانىن ايتادى.
«ءبىز سۋدى تەك سۇزگىدەن وتكىزىپ بارىپ ىشەمىز. كولگە بارىپ شومىلعان جوقپىز. تۇگەل اۋىل تۇرعىندارى ەمەس، بەسكولدىڭ ەسكى اۋماعى عانا اۋىرىپ جاتىر. نەدەن ەكەنى بەلگىسىز»،- دەيدى اۋىلدىڭ تۇرعىنى ناتاليا سۆەتلەتسكايا.
اۋىلدىڭ 15 مىڭ تۇرعىنىن 2004 جىلدان بەرى اۋىز سۋمەن قامتاماسىز ەتىپ وتىرعان كومپانيا باسشىلىعى بولسا، دەرتتىڭ سۋدان كەلمەگەنىنە سەنىمدى.
"باشنيادان ءبىر جەردەن الادى. ەگەر بىردەڭە بولسا، 15 مىڭنىڭ جارتىسى اۋىرىپ قالار ەدى. ول سۋدى مەن ءوزىم دە ءىشىپ وتىرمىن. ۋلانىپ جاتقان سەبەبى، وسى كۇندەرى كۇن ىستىق بولدى. سوندا كولگە ءتۇستى، ىستىقتا ءجۇردى", - دەپ پىكىرىن ءبىلدىردى جشس ديرەكتورى قايىربەك نۇرالين.
تۇرعىندار تاراپىنان تۇسكەن شاعىمداردىڭ سانى كۇرت ارتقان سوڭ، اۋىلعا ەپيدەميولوگتار كەلىپ، اۋىز سۋدان جانە جاقىن ماڭايداعى سۋ توعايلاردان سىناما العان. سىناما ساراپتامالىق زەرتحاناعا جىبەرىلگەن.
"دارىگەرلەردىڭ كومەگىنە 100-دەن استام ادام جۇگىندى. ءبىز تەك اۋىز سۋدان عانا كۇدىكتەنىپ وتىرعان جوقپىز. سەبەبى، ەكى اپتاداي كۇن ىستىق بولدى. جۇرتتىڭ ءبارى وزەن-كولگە اعىلدى. بالكىم ۆيرۋس سودان شىققان بولار. وبلىستىق ەپيدەميولوگيالىق ورتالىق مامىردىڭ 29 كۇنى سۋدىڭ ساراپتاماسىن الدى. ناتيجەسىن 10 كۇننىڭ ىشىندە حابارلايدى", - دەيدى بەسكول اۋىلدىق وكرۋگى اكىمىنىڭ مىندەتىن اتقارۋشى ماۋلەن قاسىمعوجين.
بۇل ماسەلەگە پروكۋراتۋرا دا ارالاسىپ، قۇزىرلى ورگان جۇمىسشى توبىن قۇرىپ، ءتىپتى قىلمىستىق ءىس قوزعاعان.
"سانيتارلىق تالاپتاردى جانە گيگيەنالىق نورمالاردى بۇزۋ فاكتىسى بويىنشا قىلمىستىق كودەكستىڭ 304-بابى 1-بولىگىمەن قىلمىستىق ءىس قوزعالىپ، بۇگىنگى كۇندە ءتيىستى كەشەندى ساراپتامالار جۇرگىزىلۋدە. بەسكول كەنتىنىڭ تۇرعىندارىنا تولىقتاي مەديتسينالىق كومەك كورسەتىلۋدە", - دەپ مالىمدەدى سقو پروكۋرورىنىڭ اعا كومەكشىسى جارقىن بەلگىبەكوۆ.
زەرتحانا قورىتىندىسى وسى اپتادا جاريالانۋى ءتيىس. ال وعان دەيىن سۋمەن قامتۋ كاسىپورنى شۇعىل تۇردە قۇبىرلاردى حلورمەن تازارتۋ جۇمىستارىن جۇرگىزبەك.
«ادىرنا» ۇلتتىق پورتالى
