Soltústik Qazaqstan oblysyndaǵy Beskól aýylynyń turǵyndary belgisiz dertke shaldyǵýda. Naýqastarǵa ortaq belgi – ish ótý, dene qyzýynyń kóterilýi. Turǵyndar derttiń dendeýin sapasyz aýyz sýdan kóredi. Al jergilikti bıliktiń óz boljamy bar dep habarlaıdy «Adyrna» tilshisi «Astana TV»-ge silteme jasap.
Qyzyljar aýdanynyń ortalyǵy Beskól aýylynyń turǵyndary sońǵy eki aptadan beri birinen soń biri belgisiz dertke shaldyǵyp jatyr. Bireýlerde ish búrip, dıareıa belgileri baıqalsa, endi biriniń júregi aınyp, ishken-jegen tamaǵyn qabyldamaıtyn kúıge túsken kórinedi. Turǵyndardyń aıtýynsha, belgisiz dertti aýylda júzden astam adam juqtyrǵan.
«Ótken beısenbi kúni túnde aýyryp qaldym. Dene qyzýym 38,6 gradýsqa deıin kóterildi. Ishim qatty búrip, ishimde bomba jarylǵandaı boldy. Belgileri koronavırýsqa uqsamaıdy. Dárigerler de osylaı deıdi»,- dedi Beskól aýylynyń turǵyny Galına Pýlnıkova.
Taǵy bir aýyl turǵyny eń aldymen qyzy, keıin ózi aýyrǵanyn aıtady.
«Biz sýdy tek súzgiden ótkizip baryp ishemiz. Kólge baryp shomylǵan joqpyz. Túgel aýyl turǵyndary emes, Beskóldiń eski aýmaǵy ǵana aýyryp jatyr. Neden ekeni belgisiz»,- deıdi aýyldyń turǵyny Natalıa Svetlekaıa.
Aýyldyń 15 myń turǵynyn 2004 jyldan beri aýyz sýmen qamtamasyz etip otyrǵan kompanııa basshylyǵy bolsa, derttiń sýdan kelmegenine senimdi.
"Bashnıadan bir jerden alady. Eger birdeńe bolsa, 15 myńnyń jartysy aýyryp qalar edi. Ol sýdy men ózim de iship otyrmyn. Ýlanyp jatqan sebebi, osy kúnderi kún ystyq boldy. Sonda kólge tústi, ystyqta júrdi", - dep pikirin bildirdi JShS dırektory Qaıyrbek Nuralın.
Turǵyndar tarapynan túsken shaǵymdardyń sany kúrt artqan soń, aýylǵa epıdemıologtar kelip, aýyz sýdan jáne jaqyn mańaıdaǵy sý toǵaılardan synama alǵan. Synama saraptamalyq zerthanaǵa jiberilgen.
"Dárigerlerdiń kómegine 100-den astam adam júgindi. Biz tek aýyz sýdan ǵana kúdiktenip otyrǵan joqpyz. Sebebi, eki aptadaı kún ystyq boldy. Jurttyń bári ózen-kólge aǵyldy. Bálkim vırýs sodan shyqqan bolar. Oblystyq epıdemıologııalyq ortalyq mamyrdyń 29 kúni sýdyń saraptamasyn aldy. Nátıjesin 10 kúnniń ishinde habarlaıdy", - deıdi Beskól aýyldyq okrýgi ákiminiń mindetin atqarýshy Máýlen Qasymǵojın.
Bul máselege prokýratýra da aralasyp, quzyrly organ jumysshy tobyn quryp, tipti qylmystyq is qozǵaǵan.
"Sanıtarlyq talaptardy jáne gıgıenalyq normalardy buzý faktisi boıynsha Qylmystyq kodekstiń 304-baby 1-bóligimen qylmystyq is qozǵalyp, búgingi kúnde tıisti keshendi saraptamalar júrgizilýde. Beskól kentiniń turǵyndaryna tolyqtaı medıınalyq kómek kórsetilýde", - dep málimdedi SQO prokýrorynyń aǵa kómekshisi Jarqyn Belgibekov.
Zerthana qorytyndysy osy aptada jarııalanýy tıis. Al oǵan deıin sýmen qamtý kásiporny shuǵyl túrde qubyrlardy hlormen tazartý jumystaryn júrgizbek.
«Adyrna» ulttyq portaly
