اقش پرەزيدەنتى دونالد ترامپ قازاقستاننىڭ تاۋەلسىزدىگىنىڭ 35 جىلدىعىنا وراي مەملەكەت باسشىسى قاسىم-جومارت توقاەۆقا قۇتتىقتاۋ حات جولدادى، دەپ حابارلايدى “ادىرنا”.
قۇتتىقتاۋ حاتىندا اقش پرەزيدەنتى قازاقستان حالقىن ايتۋلى مەرەكەمەن قۇتتىقتاپ، ەلدىڭ تاۋەلسىزدىك جىلدارىندا ساقتاپ، دامىتقان مادەنيەتى مەن تاريحي مۇراسىنا جوعارى باعا بەرگەن.
«ميلليونداعان قازاقستاندىق استانادا جانە ەلدىڭ تۇكپىر-تۇكپىرىندە 1991 جىلى رەسپۋبليكا تاۋەلسىزدىگى جاريالانعاننان بەرى كوزدىڭ قاراشىعىنداي ساقتاپ، ەسەلەي تۇسكەن باي مادەنيەتىن، تاريحي مۇراسىن جانە قايتالانباس كەلبەتىن ەرەكشە ماقتانىشپەن پاش ەتەدى»، – دەلىنگەن حاتتا.
دونالد ترامپ سونداي-اق قازاقستان مەن اقش اراسىنداعى كەڭەيتىلگەن ستراتەگيالىق سەرىكتەستىكتىڭ ماڭىزىن اتاپ ءوتتى. ونىڭ ايتۋىنشا، ەكى ەل اراسىنداعى بەرىك بايلانىستاردى ودان ءارى نىعايتۋعا نيەتتى. "مەملەكەتتەرىمىز اراسىنداعى كەڭەيتىلگەن ستراتەگيالىق سەرىكتەستىكتى جوعارى باعالايمىن جانە مەن پرەزيدەنتتىك لاۋازىمدى اتقارعان ەكى مەرزىمدە قالىپتاسقان بەرىك بايلانىستى ودان ءارى نىعايتامىز دەپ سەنەمىن",- دەلىنگەن قۇتتىقتاۋدا.
«مەملەكەتتەرىمىز اراسىنداعى كەڭەيتىلگەن ستراتەگيالىق سەرىكتەستىكتى جوعارى باعالايمىن جانە مەن پرەزيدەنتتىك لاۋازىمدى اتقارعان ەكى مەرزىمدە قالىپتاسقان بەرىك بايلانىستى ودان ءارى نىعايتامىز دەپ سەنەمىن»، – دەدى اقش پرەزيدەنتى.
قۇتتىقتاۋىندا ترامپ قازاقستان پرەزيدەنتىنىڭ كوشباسشىلىق قاسيەتتەرىنە دە توقتالىپ، قاسىم-جومارت توقاەۆتى «تەگەۋرىندى ءارى باتىل كوشباسشى» دەپ اتادى.
«قازاقستان حالقىنىڭ باعىنا وراي، ءسىز سياقتى تەگەۋرىندى ءارى باتىل كوشباسشىسى بار. وسى قۋانىشتى ءساتتى سىزدەرمەن ءبولىسۋ – مەن ءۇشىن زور مارتەبە»، - دەلىنگەن قۇتتىقتاۋ حاتىندا.
قازاقستان 1991 جىلعى 16 جەلتوقساندا تاۋەلسىزدىگىن جاريالاعان. بيىل ەل تاۋەلسىزدىگىنە 35 جىل تولىپ وتىر.
