بۇگىن قازاق فيلوسوفياسى عىلىمى اۋىر قازاعا دۋشار بولدى. ومىردەن كورنەكتى عالىم، فيلوسوفيا عىلىمىنىڭ دوكتورى، پروفەسسور ساعادي بايۇزاقۇلى بولەكباەۆ وزدى. بۇل تۋرالى ءال-فارابي اتىنداعى قازۇۋ-دىڭ فيلوسوفيا كافەدراسى فەيسبۋك پاراقشاسىندا جازدى.
پروفەسسور ساعادي بولەكباەۆ جارتى عاسىرعا جۋىق عۇمىرىن عىلىم مەن ۇستازدىققا ارناپ كەلە جاتقان بەلگىلى عالىم، پەداگوگ، قوعام قايراتكەرى، ساياسي عىلىمدار جانە زاڭ عىلىمدارى اكادەميالارىنىڭ اكادەميگى.
قر بعم-ءنىڭ ۇلتتىق ساراپشىسى، قازاقستان حالقى اسسامبلەياسىنىڭ كەڭەسشىسى، قر مادەنيەت مينيسترلىگى ءدىن ىستەرى جونىندەگى كوميتەتى ساراپشىلار كەڭەسىنىڭ مۇشەسى، الماتى قالاسىنداعى اقپاراتتىق-تالداۋ ورتالىعىنىڭ مۇشەسى، «ادىلەت» پارتياسى توراعاسىنىڭ ورىنباسارى، قر عك فيلوسوفيا، ساياساتتانۋ جانە ءدىنتانۋ ينستيتۋتىنىڭ عىلىمي جوبالارىنىڭ ساراپشىسى، بىرنەشە ديسسەرتاتسيالىق كەڭەستەردىڭ مۇشەسى، «ورتالىق ازيا ۋنيۆەرسيتەتى حابارشىسى»، «مادەنيەتتەر ديالوگى» اقپاراتتىق-تالداۋ جۋرنالدارىنىڭ باس رەداكتورى، «د.ا. قوناەۆ اتىنداعى زاڭ ۋنيۆەرسيتەتى حابارشىسىنىڭ»، رەسەيلىك «سوتيس» فەدەرالدىق عىلىمي-پراكتيكالىق جۋرنالىنىڭ رەداكتسيالىق القاسىنىڭ مۇشەسى سىندى عىلىمي جانە قوعامدىق-ساياسي قىزمەتتەردى جاۋاپكەرشىلىكپەن اتقارعان تۇلعا.
ساعادي بايۇزاقۇلىنىڭ فيلوسوفيا تاريحى، الەۋمەتتىك فيلوسوفيا، حالىقارالىق قاتىناستار، تۇرىك حالىقتارىنىڭ تاريحى مەن مادەنيەتى، لوگيكا، ەكونوميكا جانە مەملەكەت ماسەلەلەرى، سانا فيلوسوفياسىنا قاتىستى زەرتتەۋلەرى وقىرمانعا ەتەنە تانىس جانە ۇلكەن سۇرانىسقا يە. عالىم «بالاما جۇيەلەردەگى ەكونوميكا مەن مەملەكەتتىڭ اراقاتىناسى»، «الەۋمەتتىك ادىلدىك ماسەلەسى»، «قازىرگى حالىقارالىق قاتىناستاردىڭ ماسەلەلەرى»، «ديلەمماداعى قازاقستاندىق جول: شىعىس نەمەسە باتىس؟» «جاھاندىق ترانزيتتەگى قازاقستان مەن ىرگەلەس مەملەكەتتەر»، «تۇرىكتەردىڭ الەمدىك وركەنيەتكە قوسقان ۇلەسى»، «سانا فەنومەنى: جاڭاشا كوزقاراس»، «قازىرگى قازاقستان قوعامىنىڭ كوكەيكەستى ماسەلەلەرى»، «ەۋرازيالىق ينتەگراتسيا كونتسەپتى: يدەيالار جانە شىندىق»، «جاھاندىق ەكونوميكالىق ارىپتەستىك كونتەكستىندەگى ترانسۇلتتىق جوبالار» كىتاپتارى مەن «فيلوسوفيا»، «لوگيكا» پاندەرىنە ارنالعان وقۋلىقتاردىڭ، 250-دەن استام عىلىمي ماقالانىڭ اۆتورى بولعان.
پروفەسسور ساعادي بولەكباەۆ شەتەلدىك عىلىمي ورتالاردا دا تانىمال تۇلعا. عالىمنىڭ 50-دەن استام عىلىمي ەڭبەگى چەحيا، پولشا، نيدەرلاندى، گەرمانيا، پاكىستان، رەسەي، ۋكراينا، وزبەكستان، تۇركىمەنستان، قىرعىزستان، ازەربايجان جانە ت.ب. ەلدەردە جاريالانعان.
"ادىرنا" ۇلتتىق پورتالى ساعادي بايۇزاقۇلىنىڭ وتباسى مەن جاقىندارىنا قايعىرا كوڭىل ايتادى.
